Dem a go need wings fi ketch we up 'cause we waaaaay up. Bless up to Una Morgan. Hope you feel well soon. Big up all clean heart people. Big up all God-fearing people. Big up all people who nah lose the faith. Jah over all things. Latty Goodaz say dat.

Why a Billboard a fi tell wi EDM come from Jamaica?

What a way we find out say a Jamaica build EDM. If Billboard never buss it out we wouldn't know. Nuff a dem farrin artiste and producer ya a gwaan like a fi dem ting.

Jamaica to the world! Everything we do dem follow. A full time we start make some real money offa dem tings ya.

A we a the conceptualisers and we nah make no money offa it. Government need fi help we. We want justice!

Dem mosquitoes ya a gwaan bad

People, dem mosquitoes ya now a days a gwaan bad. Is like dem a walk wid AK-47. Dem heng on inna yuh flesh like say you owe dem money.

If yuh nuh careful, dem will all lift yuh up and fly off wid yuh. Health Ministry need fi come spray the place. We caan tek another chik-V epidemic.

Trabass and wifey, unuh need fi find Jesus

Me love the way you look right now, like say you wudda ... hi Trabass and wifey Deannee. How is married life? It look like it 'gree would unuh because me see Deannee say she nuh mind if you carry home a girl.

Me nuh know wah marriage come to nowadays. Man and man a married, woman and woman a married and now unuh want to have extra partners. Nanny of the Maroons never dead fi unuh a have threesome inna unuh marriage.

Paul Bogle never walk from St Thomas fi people married and want extra partner. Unuh go chant a psalm, say a prayer and find unuh way back to Jesus. Halleluyah!

Joe and Skatta have nuff money fi pay

Dem say dem money nuff, but my money stock and pile. What a way Joe and Skatta haffi pay $15 million to a producer fi Specialist Phonecard song because the man say unuh use piece a him rhythm. Me know it must hurt Joe dem because Specialist not even round deh fi help dem pay back the money. Dat deh $15 million a nuh money to Joe, but still, Specialist need fi really go sell some phonecard and banana chips and help the man dem sekkle the claim.

Question Time: A true say Darrio split from SubKonshus music? Darrio link me and mek me know wha really a gwaan.