Summertime a come round. Big up all the kids who pass them GSAT; unuh ratings tall!! Big up all a di people dem who a save from now fi go Dream Weekend, but dem still owe student loan. Unuh future dark.

POTENTIAL KIDD

why police a call yuh name?

Woooiii, a yah so nice. Potential Kidd, it look like yuh really need some saving because me sure if you go prison, you a go need fi tell the man dem which pawt dem can find the niceness. Imagine, you have one likkle song donkey years ago, and now police a call yuh name? try find a next song and ting! Yah so nuh nice at all!!!

Pure 'rubbish' a gwaan inna Ja

Earth a run red, the garbage man dem caan even collect the rubbish in peace. A wha really a gwaan inna Jamaica?

We cuss if garbage pile up a we gate and den turn round beat the man dem when dem come collect it? Dem all a make police escort the garbage truck because people a beat the man dem! Unuh stop the foolishness. Make the police go fight actual crime and go run dung thief and taxi man!

DEXTA DAPS

big song bad video

All when dem say 6 man go deh, guess who make 7? Dexta Daps, it look like a only seven people inna the world did like da video deh.

Big, hot song like that and is dat deh dippy dippy video deh you make dem put out? Me hear say you never approve it, and mi nuh wrong you. The video look like it shoot pon somebody phone and the girl dem cudda find some better clothes fi wear.

Why some artistes a fight over 'bread'?

Bread! Bread! No wet bread! Unuh artiste love war so till unuh all a war over foolishness! Imagine, none a unuh nuh have no chart-topping song, and unuh come a fight over the slang 'bread'?

Fantan Mojah, when last you have a hit song? Me like you song dem but you need fi left out some things and focus pon the music. Quick Cook... me not even know wha fi say to all you. Big up Baby Fast fi me deh.