'Mek hay while the sun shines, put down some-thing fi a rainy day and plan fi yuh golden years' a weh many hear and know bout, but few tek heed.

It seems like some people think dem a go young forever or invincible and so dem cork dem ears to these anecdotes that, as simple as dem seem, have a whole heap a wisdom inna dem!

Whole heap a people mek the mistake of just thinking about and living in the here and now and naah realise seh the years dem a pass and the grey hair and di wrinkles dem a come hard!

Many get opportunity and mek it but squander it fi impress people. When dem money did nuff dem buy all weh dem see and weh dem no see and no do nutten sensible with the money. Nuff a dem naah seh block, steel and cement, dem a seh 'hairy bank' and hype!

When money nuff yuh haffi knot up some and put it away! If yuh no believe inna bank if a even under one mattress someweh or roun' a one part, yuh fi tuck weh some!

If yuh no respect money, it won't respect you. It's not about what you work, it's what yuh save because many mek di money and afterall is said and done, dem bruk like church mouse! When people busy a 'lash' and a have pickney pon top a pickney wid various different people, dem naah calculate how much it a go cost to maintain and provide for these children. As a matter of fact, nuff a di pickney dem not even get no mining because the money channel elsewhere.

Many times these same people expect and some all demand seh dem pickney fi tek care a dem -

even though they did not contribute to their development.

What yuh can do at 20, yuh might no can do when you're 30. What yuh can do at 40 and 50 yuh surely can't do it at 60! Dem time deh the aches and pains start sekkle in and di ting start wata dung.

A dem time deh savings and the much weh did a accumulate over the years come in handy, so yuh no haffi be a burden to nobody ... not even yuh pickney dem, because they too have their own lives to lead.

It is important that we have a succession plan when it comes to money fi pension and old age! Sickness has no respect for anyone, and anybody can sick at anytime. When it come to sickness and legal trouble, dem two sinting deh will nyam out yuh money fassa dan chi chi, so money haffi put down fi old age.

Even those parents who look after dem pickney and give their all, must have even a 'chupance' stash weh because some pickney a wicked and when nutten wrong, they are nowhere to be found.

The idea that yuh live and then jus dead doesn't happen in that order for everyone ... Nuff people naah pree the in between ... the accidents, stroke, ailments and tragic circumstances.

Mi naah tell nobody fi be a rich duppy because mi neva see a Brinks truck a one funeral yet, but we haffi be wise and frugal when it come to money and putting some away for a rainy day because any number can play!

We haffi start invest, insure and ensure seh when retirement comes, we have something to fall back on.

By right, savings fi start from the first pay cheque and so it becomes a habit that will pay off in the end!

Big up to all the nominees and winners at The Star Awards Saturday night. It did tun up loud! Show sweet like sugar! Big up to all who voted and all who support The Star from dem time deh til now! Big up unnu nice clean self! Yeh You!