Happy Mother's Day when it comes to all good, clean heart mothers. Some girl ever hot and dem baby hungry. Unuh fi stop it.

Jamaica a move cold and wicked from wha day ya. Every minute me hear say a next pickney get abducted. We need to be more vigilant of each other and protect our kids. We need some prayer and fasting fi Jamaica.

RIP TOYA

RIP Toya. Condolences to Joe Bogdanovich and the whole Downsound Crew.

Bailey yu nuh reach yet

Di one likkle race Ryan Bailey from USA win, him think a heaven him reach. Bad colour Ryan Bailey, you barely win the race and a do cut throat sign wid Usain Bolt pose.

You foot dem fava when dem scald chicken, you look like when goat constipated. A the only race you a go ever win whe Jamaica involve inna so gwaan enjoy the moment. Big up Warren Weir, me glad how you defend Bolt.

Bridgez hope di throat ting work fi yu

Look wha me live fi come see? Two artiste a fight over who first say dem a put tings inna dem throat. Bridgez, you a try buss long time, me hope dis work out fi you because you and K Queens a di only two artistes whe not even the great Bounty Killer couldn't buss. The next girl name Nae Nae or Naw Naw, something like dat. Me never hear bout you yet. A who yuh? A whe yuh come from? How you come a fight over teely lyrics? Big up Lisa Hyper, a you set the trend.

OMI A SHELL DUNG FOREIGN

Big up Omi. Omi you a shell every international chart. From USA go Europe, a you a run the charts. Nuff artiste think a dem a run the place, but the only ting dem a run a dem mouth. Big up to Delano and the rest a di Renaissance family on unuh ASCAP awards. Unuh large.

People too red eye

You know say Jamaicans have a bad habit, as a likkle ting start gwaan fi one a we, somebody jump up and say a dem first did have the idea. Look how long Chi Ching come out wid Watchi Wyah song and dance, and as him start get likkle forward, unuh jump up say him tief it.

Whe unuh did deh before him start Watchi Wyah. All of a sudden everybody a watch wire. Bring the proof come and I will believe. Big up Chi Ching Ching, from Moses was a boy you a dance and now it a pay off.