Wooooiiiiieeee!!! Bless all a mi TamFam. Big up unu good-good self. An straight blessings to all a mi Ragashanti Live listeners pon Tambourine Radio ova www.tambourineradio.com A unu mek di ting a shot soh. A unu mek Obama Lan a hear bout we. Bless up unu self an crazy tanks.

Mi waan say blessings and thanks fi all who did roll out fi di Tambourine Radio Launch Party. Wat a party noice!!! Noooo sah if di party did nice one more time mi woulda mus poop up mi self. Dwl! But big up all who roll out an support di ting an mek we full up Amazura Concert Hall, and lock dung Queens, NY. I an I Ragashanti a say straight tanks.

Hear ya now. Unu memba di former owna a di Los Angeles Clippers NBA basketball team weh him bunna gyal weh name V Stiviano buss out some tapes wid a whole heap a racist tings weh him a say bout black people?? Well, yes ya now di mix-up a mek some rahtid twists deh. Yuh nuh know say di man wife carry V Stiviano goh a court fi get back everything weh har husband did gi har. Yeah! An pon top a dat she win to rahtid. Di judge ordered V Stiviano fi pay back di wife US$2.6 million in gifts!!! Pupa Jeezas!!

V Stiviano haffi gi back a US$1.8 million house, cars, an a bag a oda tings including a $12 thong!! Yes to rahtid di wife nuh inna nuh ramping she waan back di money fi di thong!! Wid di militant mood weh di wife inna she probably woulda all directly tek back di thong too. Waaaaiiiieeee!!! V Stiviano!!!....bring back di tong!! Wifey nuh care if di tong soil jus bring yi back!! A nuh your money buy it soh stap wear drawse weh nuh belong to yuh!! Miss lady yuh nuh hear say yuh fi bring back di tong NOW!!

Wooooiiiieee mi cyan bada enuh.

Seriously, though, di whole drama base pon California law weh say whateva a husband and a wife mek togeda BELONG to BOTH a dem, an needa di wife nor di husband is allowed fi gi weh wa belong to both a dem. Soh the court is essentially saying that the husband bruk di law wen him gi matey di tings dem widout wifey consent, and therefore di matey mus now return to di wife everyting she received fram di husband.

Bring har go court

Soh unu tell mi supm if da supm ya goh tek off a Jamaica den nuh pandemonium woulda inna di land of wood an wata??!! If di wife dem staat carry di bunna gyal goh court fi get back everything weh dem husband gi dem den nuh woulda worries inna di place. Cause wid di amount a bunning weh gwaan a Jamaica a dat time wi courts dem woulda clog up!!

So here's di question mi waan unu ansa. Wen a husband gi matey a whole heap a tings, an den jump up inna matey belly, fling some propa wuk pon matey, beat out crasses outa matey juju, is it right fi di court order dat matey mus return everything weh di husband gi har because wifey ask for it to be so?????

Matey nuh have rights too???!!! Wapm to matey rights???!!!

Unu try write mi an mek mi know wa unu tink, caa dis ya one ya hotta da 10 fireside!! Link mi at ragashanti@ragashanti.com

Awright, mi a leggo ya now. Bless up unu self till nex Thursday. Till den. Do Road!!