A wah dat fah kranium

Hi, hello Mr Kranium, a wha dis mi hear say happen wid you and Latty J? A true say dem put her pon a song wid yuh and you say you nah release it because she is not an established artiste? A true sumn dem a talk? Mi hope a lie because as far as me know, you a nuh big artiste needa. You have one song whe a gwaan good, but mi nuh see you pon nuh big show nor nutten. Mi hope a nuh hype you a hype up yuh likkle one song self.

Pretty Dunce

Mi say, dem ya school pickney nuh have no likkle shame and remorse. Imagine, you parents work so hard fi send you go school and you find time fi go dash out yuh body inna car back inna cane piece. Den, fi mek matters worse, yuh a bawl out yuh throat like when dem a kill out fi funeral. Unuh need fi do better. It nuh look good. Stay inna school and tek unuh book. Pretty dunce nah hold man again.

Mi a God pickiney, Mi a God pickiney, all dem a do dem caan stop me. Tek yuh mind offa me, tek yuh mind offa me, a nuh me mek you nah mek no money. Yes people, Keisha Roun' Up deh ya again. A we say drop it like a dolla coin an roll it like a dice.

A wha kinda passa passa dis wid Stylysh and the uptown chef? Stylysh say she did suppose fi have a show inna Brian Lumley restaurant and after she start advertise her ting, him decide say it cannot keep deh. The chef say him have obligations so him haffi approve every artiste whe perform inna him place, and sad to say, Stylysh was denied. Nuh worry yuhself Stylysh, whole heap a restaurant have big space fi yuh keep show. KFC and Juici Patties have big space in deh.

$100 sex

Somebody send me the video wid di mad man a have sex wid di homeless woman, and mi stomach sick same time. Some a unuh people need prayer and fasting. Unuh really pay di man $100 fi have sex wid di homeless woman? Unuh need fi do better man. Some a unuh too disgusting.