Woooiiiee!! Tan good Tambourine Fambily an Mixup massive big up unu God bless self!! An propa spek to all a mi Ragashanti Live listeners pon Tambourine Radio ova www.tambourineradio.com . Str8 blessings mi say!!

Mixup to di ting ya now:

Everybady a Bun Everybady!!

Unu pree da one ya. Husban an wife live togeda a Florida. Di husban do him likkle hustling ting yuh know sell da ting deh. Di husban tell him wife say him need fi buy a car fi him sista weh live a New York, but dat him a goh need him wife fi use har name fi buy it, cause him cyaan too have up him name inna di system. Di wife agree an him an har goh buy di car.

Di husban den tell di wife say a one a har church brother a goh drive up di car to New York an gi it to di sista. Soh di church brother fahwud an tek di car an drive it weh.

But wa really did a gwaan was dat di husban really did a buy di car fi him bunna gyal. Soh him did arrange wid him likkle sista a New York an him wife church brother fi dem play along wid di ginalship an tell di wife di lie dem too. Soh wen di church brother did pick up di car a really di husban bunna gyal him did gi di car. An di bunna gyal live same place a Florida too. Den di husban likkle sista a New York did all call di wife an tell har lie say di church brother did drop off di car an all a tell di wife tanks fi har assistance.

But hear ya now, di bunna gyal did have har owna man weh di husban neva know bout. But di bunna gyal man did know say him woman a di husban side chick.

Soh one day, di bunna gyal goh len har man di car fi goh deal wid some business. Him nuh do nuttin more dan goh pick up a nex gyal an a do road wid har ova di beach a Fort Lauderdale. Wen dem ova di beach DI HUSBAN GOH SEE HIM AN DI CATTY INNA DI CAR WEH HIM BUY FI DI BUNNA GYAL!! Di husban step to di bwoy an demand di car. Di bwoy goh refuse an mek di husban get bringle. Di husban end up a beat up di bwoy an tek weh di car keys fram him an drive weh di car. Di bwoy get mad an call dung police pon di husband! Di husband den staat to explain to di police say a him buy di car. Soh di police dem ask him fi di car papers an ask him fi prove say a him buy it ... only fi find out say di husban did eventually put di car inna di bunna gyal name! Di police dem den say because di husban name nuh deh pon di car papers, an because him cyaan prove ownership a di car, dem haffi goh lock him up fi steal di car. An jus like dat baps!! ... di husban end up inna jail.

But di prekeh nuh done yet. unu nuh know a who eventually did haffi goh bail di husban fram jail?? Yeah DI WIFE!! Di husban end up haffi tell di wife everyting. Di wife get bex an decide fi still defen har husban, an she an di husban goh dung a di bunna gyal yaad fi get back di car. But di bunna gyal get billias an say she naa gi back di car cause a har P-pension!! (unu know a soh mi haffi write it cause a The STAR dis lol). An jus like dat di husban couldn't touch back di car an haffi lef it wid di wife matey.

Den di matey good-good man weh did a bun har wid di oda woman weh did inna di car wen di husban ketch dem goh get fi him kin inna prekeh too. Di damn eediat know him nuh legal inna Merica, nuh have nuh papers, but run gaan mek report to police say di husban tief di car ‹ wen him done know say a di husban did buy di car fi true. Ole eediat! KMT!! Now dem a look fi deport him.

An di husban a eediat too. Fi a man weh a hustle inna di street, an done know say him haffi careful fi him wife nuh know say a really di bunna gyal him buy di car fa - him shouldn't move to di bwoy wen him see him wid di car weh him buy. Him shoulda jus clutch an step to him bunna gyal an mek she know di hundred say she haffi goh tek back di car fram har man. Di husban goh luu him bait up him self. Klaffy nuh know how fi govan him ting.

Now di bunna gyal still have di car, an di authorities a try now fi dip har man.

One big nasty mixup prekeh!!

Anyways, a leggomentz ya now. Unu sen mi unu mixup dem at tambourineradio@gmail.com. Bless up unu good-good self.