Everybody born inna Brazil

A football time and everybody and dem mada a cheer fi Brazil. Everybody a behave like say dem did born inna palace dung a Brazil.

Big up all the Spain fans dem. From something to nothing. Number one last year and number two million dis year. Big up all a di girl dem whe a carry a team because the man dem look good. Nutten nuh wrong wid dat.

Nobody nuh haffi know say mi and you a touch, nobody nuh haffi know say you a give it up. Some girl nah get no knowings because the man shame a dem. A baaay mek some a unuh can only see unuh man when light gone. A me name Keisha Roun' Up an mi deh ya di talk fi tings dem

Drake massacre Kranium song

Drake

Mi hear the one Drake a sing over Kranium song, and mi almost jump offa cliff. Drake sound off-key baaaaddd. Kranium please go tell Drake fi stop massacre you song.

Mi not even did realise say a it him a sing to how him sound bad. From Mavado deh a farin till now, him caan tell Drake how fi sing inna patois?

Nuff girl caan sleep a night

Mi know nuff girl caan sleep a night time because dem hear say Konshens engaged. Nuff a dem nah eat no food cuz dem a fret.

Konshens

Konshens, mi hear say you engaged, but mi nuh sure a true. Mi glad fi you though because mi like fi see when man sekkle dung and ting. All a di groupie dem haffi go join a next line because Konshens nah look fi unuh way no more.

Macka Diamond a breast feed baby

Dear Macka Diamond, a wha mi do you? Why you must always a assault mi eyesight wid you body? Macka, mi see you a breast feed you baby wha day ya. Mi like how you a good madda, you mek sure say you baby belly full. LOL.

Macka, you really do interview and say somebody leak the picture? The picture look like it tek right beside unuh, like is a selfie unuh a tek. If you know wha me know you mek sure you roll up back you breast dem inna the brassiere. From last year mi a see some picture wid u wah mek mi want stab out mi eye dem.

www.jamaica-star.com