Matterhorn cools M Gee

Mi never deh ya last week but mi hear say one businessman allegedly a walk and spread AIDS to women, including pickney. Mi nuh sorry fi some a unuh because unuh too licky, licky.

Unuh nuh know di man dem from nowhere, unuh nuh know dem sexual history but because him look nice and because him have money, unuh run gone open shop. Unuh fi stop it. AIDS rampant out a road. A nuff cute man have it. A nuff rich man have it and a wait fi give some a unuh loose woman. Unuh need fi protect unuh self.

All now mi still a wonder a who name M Gee, but mi hear say Tony Matterhorn a deal wid him wicked pon Instagram. Mi never hear a song from M Gee, mi not even did know say somebody name M Gee.

A Matterhorn mek mi know say artiste out deh name so. Missa M Gee, mi glad say you did a defend di woman dem and ting, but trust me, mi a go need yuh fi work pon yuh image likkle bit please and tanks. If yuh a go come inna STAR pon front page, ya go need some better picture.

A chat dem a chat, yap dem a yap, Keisha Roun' Up a action pak. Tell dem anyting, a anyting, any vocal any singer, fi rise 'gainst Keisha is a heavy sin. A we set di trend and dem go follow we!! Big up all who fi big up and bless up all clean heart people. A ya so nice.

Call di contractor, airport a bun dung!

Airport a bun dung! Airport a bun dung!!! Call di contractor. We need di contractor. Mi frighten out a mi sleep wha evening ya fi hear say MoBay airport pon fire.

Mi glad fi know say everybody alright and a never nuff damage because plane can still fly out and fly in. Mi glad so till because mi auntie did a send a barrel wid some Irish Spring soap and Wrigley's. Mi glad say mi barrel safe and secure because mi did really need the cereal and bully beef dem.

Wah kinda cow bawling dat bad man a pud dung

What a piece a cow bawling dem claim say Tommy Lee puddung pon the recording. Tommy Lee claim say a nuh him, but di person whe a bawl out like dem strangle goat, sound like di Sparta Boss fi true. Mi nah tell no lie, mi a listen the audio good, good and den mi hear one piece a hollering like when mi granny use to beat mi wid broom.

Everybody a bad man till dem buck up pon a badda man. Tommy Lee you say a nuh you but mi want more proof dan dat. You haffi go bawl and mek mi decide if you bawl different from the person pon di tape. So try yuh best go release a bawling song so people dem can judge fi themselves.