Wa a gwaan peeps? Wa unu deh pan?? Mi deh ya a chill an a shot up mi show up ya inna Obama Lan. Bless up mi Tambareen Fambily an all a mi Mixup linky-linky. An big up to all a mi Ragashanti Live listeners. Str8 blessings mi say!

Right ya now, a some hospital mix-up we a pree. Soh ketch dem ya:

Patient Abuse Mix-up

Raga, two weeks ago, me deh at a certain hospital and mi see some people a examine di ward, security and bare sittin. So a bare whispering a gwaan, till me hear from di shout say a security sort out one a di mentally disabled ooman dem! A young girl eno. Raga, sexy an roun an bare sittin. Look like di sort out shot cuz him gi har five gran. But di patient dem noh suppose to ave money an' dem fine har wid it an a so di bizniz buss out! But yuh noh know wah?? Di girl HIV positive and di security deh wid one a di nurse ova deh! A bare drama cause dem a try keep it pon di low down. Di question everybody waan ansa to is if di man did use condom? But from him get ketch, nobody noh si him.

Yuh know say a long time we a hear di tings dem bout staff a sort out di mentally disabled patient dem. Mi nuh sure if dem can implement 100 per cent safe measures fi protect di patient dem, but dem fi at least tek some serious steps fi protect. Dat a nuh one good look. An mi doan even a goh say nuttin bout di HIV positive issue ... it serious.

Farin Hospital Mix-ups

Big Up di nurse weh di patient drag off har wig because shi tek too long fi come wid di medz.

Big up di dancehall people dem weh move from dem borough fi come get treatment and when dem come inna di facility dem buck up inna people weh know dem.

Big up di two nurse dem weh buss fight over the married doctor man and lose dem wuk. Doctor still working at the facility wid two new girlfriends.

Big up the clerk weh fight a oman in front a one of the hospital building over har incarcerated baby fawda.

Bless up

Ku ya, a bare tings a gwaan a da hospital deh. You involve inna any a di mix-up dem? ... LOL

More Hospital Mix-up

Raga, me have a mix-up fi give yuh bout one time me admit in a hospital. There was dis handsome resident doctor who was a DR in a hospital.There was dis pretty girl who was nex to my bed who have cancer.

Me and her use to talk good good while I was in the hospital. Raga, the girl ask me if mi like di Dr and mi seh yes.

Di doctor live in a cottage pon di hospital grounds. Raga, di girl say if mi want di Dr fi sort mi out, mi and her must sneak out when di nurse dem a sleep.

Raga, I did have a big crush over di doctor but mi never did a tink bout sort out. She tell mi she sort out wid di doctor already and if mi want prove it mi must come wid her pon the move dat night. Becuz me name nuffy, mi follow her dat night but I didn't go inside, mi just peep tru one window.

Raga, di sick girl jump pon di doctor and give im di ride a him life! Di way mi frighten mi run back a di ward becuz mi couldn't believe dis girl sick an do dat. Raga, di gal ride di doctor like a livin jockey. Then when daylight and nurse a run ward dis same gal a bawl fi pain.

Woooiiieee!! A weh yuh really a tell me say a gwaan inna di people dem good-good hospital!! Cancer patient admitted inna hospital an de deh a dash out har juju pon doctor??!! Nooooo sah!! A cyaan manij eno!

A dem kinda mix-up ya mek di boasy people dem nuh like me ... cause dem mix-up ya buss out di tings dem!! An nuff big shot people a Jamaica ongle want Ghetto People truths buss out, but nuh want fi dem own drop a road. But unu talk up!!! Cuz we nuh fraid a people roun ere!! Hot ya now! ... LOL! Mi cyaan bada eno, dwl!

Yuh know wa, unu write me an sen me some more Doctor mix-up, SEN MI DEM! Mi waan know di tings dem!! Awoh!! ... LOL!

Awright, a leggomentz now. Sen mi unu mix-up dem at tambourineradio@gmail.com Unu tek cyere till nex Thursday wi meet back right ya soh.

Do road!