Woman get box ova dance!

Mi say mi read inna di STAR say one man box dung a woman because him beg her a dance and she nuh look pon him. Unuh listen to me, a wha do some thirsty, stay bad man? If the woman don't want dance wid you, den you need fi go home, bathe, brush you teeth or go do some plastic surgery because it simply mean say she is not interested in you. Him box dung the woman and all dislocate her jaw, so you know say is a rawtid box she get enuh. Look yah, if you beg a dance and don't get any, just hold a corner and dance wid yuhself.

Mi good good bring life!!! Big up mi nice skin, clean skin baby dem and big up Kalado!! Yuh buss ya now. A you a run dancehall. Big up yuhself, a long time yuh a try so mi glad you get a buss. Some people inna ANG from Columbus sail come a Jamaica and all now dem cyaan buss, so big up yuhself Kalado and big up the Grung Gaad. Nuff people waan know a who me ... . A me, Keisha Roun' Up, same one. Mi inna nuff man dream and nuff girl nightmare. Big up unuh self.

Unnuh need better publicity stunt

Demarco dem say scammers a target dem. It look like the stay-bad three-sum picture whe dem claim say 'leak' never a work so dem did a try find some publicity elsewhere. Whoever released di picture cyaan trick me. First of all, mi see say the lighting inna the picture look like it stage, secondly, why dem a wear mask? A Demarco dem nuh want see them face? A who dem a hide from? KMT ... unuh need fi start come up wid some better publicity stunt. Unuh need fi start set unuh self pon fire or supm because dem one ya nah work fi unuh.

Kippo, Cobra, Ryno drama

It look like Laing need fi keep a Sting part two because from Sting dun till now, Ryno, KipRich and now Cobra a drop bere dis song. Normally, people wudda release song before Sting because dem want get booked but it look like say people stop hype inna October and November and start hype inna January. KipRich say Cobra is a coward. A di Helta Skelta KipRich a come feisty himself wid? A really Helta Skelta KipRich a call coward? Mi nuh rate say Cobra diss up Kippo mother still. But Cobra say Kippo betray him and disrespect him and say KipRich need fi go sell phone. Di war a get drastic yah now. Mi caan wait fi da clash ya.

Fight ova 'Walk Like A Dog'

People, di werl a done. Fadda God a come fi him werl. Jamaica gone to di dogs fi true. Mi never think mi wudda live fi see the day when people a fight over a dance name Walk Like A Dog and Cock Up and Piss. Mi nah think say people wudda really wear dem nice, clean decent clothes go a party and a walk like a dog and cock up and piss. Mi hope say when unuh a do the dance unuh stuck inna the position and haffi stay so fi the rest a unuh life. Unuh move from ya wid dem foolishness ya. Mi want dem come out wid a dance whe name 'GIMME SCHOOL FEE FI GO BACK A SCHOOL CUZ MI A MUSSI IDIAT'. KipRich Ryno Mad Cobra Mad Cobra Demarco