Laing if you a ban, ban fairly

But Laing, di people dem say if you ban D'Angel, you haffi ban bout 10 more artiste because a whole heap a dem did up deh a behave like leggo jezebel. You need fi review di tape dem because some other people need fi tan a dem yard next year too.

Sizzla Kalonji

A 1,2,3! Mi touch a man and him fall in love wid me. Big up all a di Goodaz family. Happy New Year. Some people did a pray fi wi pop dung, but we holding firm like Sizzla Kalonji. Dem caan get we out. Mi did deh pon a likkle vacation but mi come ya now. A me say fly out like Portia Simpson. A me say tek plane like how some people tek bus. A me say 2014 we a go rich.

Really LA Lewis?

Mi hear say LA Lewis want enter 'The Voice'. Mi hear say him have him driver's license ready fi board di plane and go represent Jamaica. Mi hear say him might all borrow Portia jet fi go over deh because yuh know say LA Lewis ting nuh normal. But please me a beg you sir, before you enter 'The Voice', try out fi 'Rising Stars' because mi know if you go over there go sing, dem probably haffi go lock dung farin and tek back fi everybody visa.

Tan a you yard D'Angel

From I born till now, mi never hear bout show a ban people as patron. D'Angel you known fi create history inna dancehall but dis one ya tek di cake. You mean fi tell me say dem never book you fi Sting an you crawl thru VIP like a ants and go pon stage a ask fi Marco Dean school fee? Why you nuh ask you baby fada fi you son school fee? Why you make Laing haffi a tek libaty a yuh and tell you fi tan a you yard? It don't look good. You a di ongle person inna history mi know whe lef dem yard go stage show and promoter tell dem say you fi tan a you yard.

2 Chainz did flop!

Before me go, mi nah hide and talk, 2 Chainz did boring. Mi a watch it back pon YouTube and drop asleep bout six time. Nuh badda carry him back.

Ryno beg you a smalls nuh!

Ryno, link up Latty Goodaz. Mi know you win the three million. Mi a beg you a smalls out a it. Mi baby school fee need fi pay.