Tambareeeeeeeennn!!! Wa gwaan peeps? Unu good? A hope soh enuh. No bada mek di worries a di worl an anybady crasses get di betta a unu. Strength we say. An no giving up roun ere ... no matta di crasses, no matta di almeshouse, no matta di stress. No giving up! Never!

An always rememba di Ragashnti motto: Laugh, Learn and Grow.

As usual, unu know mi haffi big up mi Tambareen Family an all a mi Mixup massive. An propa respek to all a mi Ragashanti Live listeners ova tambourineradio.com. Large up unu self indeed.

Awright, mix-up time now:

Wifey get Sheg!!

Mix up big up to a woman up ya a Obama Lan weh suspek say har husban a bun har, an decide say she haffi find out bout it. Har husban work a one popular big airport up ya. She did notice say him a mek some funny movements fi a while, soh she staat trail him an a spy pon him all di time.

Eventually, she notice say a regular him link up wid a special flight attendant fi a big airline. Afta a while, she figure out say dem really inna tings. Him always a pick har up wen she fly een, an always carry har go a hotel fi a while before him carry har goh a har car.

Eventually, di wife staat plan fi divorce har husban. She contact a lawyer an dem get a private investigator who track di husband an tek nuff pitcha a him an di flight attendant. Everyting did line up fi she divorce him an tek weh almost everyting weh him have.

But, one day, di wife a reason wid har husban an neatly a ask him if him eva cheat. A deh so di husban ansa an say di only ting deh pon him mind is fi get betta fi she an dem family, an dat right now him a hustle fi dem future. At di same time him show har two accounts wid crazy money weh also have har name as account owner! Di husban explain say him a work pon di hustling, but neva waan tell har di hundred jus fi protect har - but dat she fi know she have full access to all a di money.

In response, di wife still a focus pon di bunning and ask him if him a sleep wid anybody weh him a hustle wid? Him tell har no. But, it look like she neva believe him. She den force him fi tell har everyting bout di hustling between him an di flight attendant.

Di wife mussi den get greedy, cause she tell har lawyer fi hol off wid di divorce an den she move to har husban an demand dat him bring har eena di hustling. Di husban tell har say him coulda neva mek she do dat. But di wife force him fi mek she mek a run inna di hustling.

Family, yuh nuh know say di wife mek di hustling run an di fus goh she goh di Feds dem kalla har an lock har up! Dem eventually convict har an gi har a long sentence. Now she inna prison an har husband deh a road wid di flight attendant.

While mi naa fight di wife fi a investigate har husband if him a bun har, a still fi har fault mek she deh a prison ya now. Even if she did jus go ahead wid di divorce she woulda awright.

An we could even argue say fram har husband mek she know say har name deh pon every account him have wid di hundreds of thousands of dollars she coulda bounce di ting different. She too damn greedy!! Craven choke puppy.

An we doan even know if di husband did find out weh she did a plan an set har up wen she did a mek di run. Or, maybe, a di flight attendant sink har. Eeda way a still di wife ultimately responsible fi she deh a prison ya now. Want all, lose all.

Anyways peeps, mi a leggo di ends ya now. Sen mi unu mixup dem at ragashanti@mixupyaad.com.

Cutmentz.