Latty Goodaz come fi talk di tings dem, talk di tings dem, buss a gal businesssssss. We deh ya another week and we nuh pet nor powder people. We talk it like it is. Big up all fi get big up and all who nuh like the Goodaz people dem can go suck an egg. Email me at lattygoodaz@hotmail.com

Stadium empty

Reggae Boyz have match wha day ya and a ongle Horace Burrell and bout three more people inna di stadium. Di place empty like how poor people pocket empty. Den dem all a charge people $1,000 fi go inna stadium. Horace Burrell mi nah give yuh my money. You shudda a pay people fi come watch dem.

No sah. Mi nuh have it. Mi see say unuh mek Tuffy start dis time. Last time unuh only give him six degge degge minute fi play. Burrell, I am watching you.

Sting ago shell dung

Sting shell dung dis year. Laing and Joe draw fi di Don Dadda Super Cat fi come shell dung di place. Mi just hope say dem give him some medication because Super Cat look like him fi deh pon some strong medz and mi nah pay my money fi listen to nuh ramblings.

Everybody a go enter

Tessanne 'intanashinal'

Mi say mi watch The Voice wha day ya pon a likkle station and mi nearly have heart failure. Tessanne! Tessanne Chin!!!! Yuh buss whe like a big beigey kite. Tessanne yuh buss whe like how Usain buss whe lef Justin Gatlin. Yuh buss whe like how Kartel buss whe lef the two case dem a prison. Fi one, Donnna did a bawl out ar troat inna yuh ears like she waan deaf yuh, but a we say win every battle. Tessanne mi proud a yuh so till. Mi feel like a mi a yuh madda. Mi know nuff Corporate people a go run yuh dung now fi sponsor yuh, make sure say dem money tall up cuz yuh 'intanashinal' now.

Mi know say by next year everybody a go start enter foreign competition ya now. Mi a look out fi unuh cause mi know unuh 'falla fashion' badddd.