See di body ya whe mek man comfortable, no lame man whe nuh compatible, Raine Seville a who yuh ya dash wud pan? A who nuh compatible wid yuh? Mi like it. Di rest a di song kinda lame but dah part deh shot. Yuh nuh look too bad inna the video either. But Latty Goodaz a wait pon yuh fi talk a who a di lame man weh nuh compatible. Mi loike it. Big up all a di Goodaz dem. Big up all a di woman dem whe nuh have lame non-compatible man. Memba fi email me at lattygoodaz@hotmail.com

Killa and Vegas war tun up

Di war wid Killa and Vegas tun up and buck. Killa make song bout it and Matterhorn make song bout it mi hear. But all whe a gwaan, mi still want somebody explain to me why Killa hair caan grow. From mi born till now! Killa hair deh pon di same length. It like it stunted like some a di ANG artiste dem career.

Heartless! How unuh fi rob di dead?

Mi caan believe it. Unuh mean fi tell me seh unuh all a rob from dead people? Imagine, STAR, Supreme Promotions, Downsound Records and some other people go down Waterhouse and help a little old lady rebuild her house and buy furniture. Di poor old lady dead last week and some a unuh really go in deh go TIEF out di furniture. How unuh so heartless? Mi hope say her duppy haunt anybody whe TIEF di tings. If is a chair unuh tek, every time unuh siddung her duppy fi siddung inna unuh lap. Unuh too TIEF. Anyway RIP yah Miss Reid.

Konshens buy X6

Good body, clean skin, hype man Konshens, mi hear say yuh buy X6. Di ting tun up again. It look like di shoes dem really a gwaan good. Mi never a tek up my $10g an buy it cuz a nuh really my style but yuh nah gwaan too bad. Mi hope you drop the price fi di shoes soon so mi can afford one. Gwaan mad dem in a yuh X6 mi fren. Yuh ting large.

VCB yu free!

Veronicaaaaaaaaaa!!! Mi glad fi you. Mi glad dem free yuh up suh dat you can make more money again. Wha gwaan fi Asafa and Sherone? When dem a go free dem up? Asafa all a make calendar fi di girl dem whe nuh stop lust offa him healthy body. Send two come Latty Goodaz way Asafa, send two calendar to me.

Yendi release di baby pic

Yendi finally release her baby pic. Di baby nice and pretty is a shame. Mi know nuff people did a wait pon the picture fi drop because dem did a wait fi see who the baby look like. Mi still a wait pon di wedd'n cake.