How da Friday ya look suh? How di people dem a wait pon di suss suh. A Latty Goodaz enuh and a we say fridge inna house and key to we owner door. Big up all a di independent ladies and big up all a di woman dem who haffi be independent cuz no man nah mind dem. Memba fi email unuh suss to lattygoodaz@hotmail.com.

Legs fi show yaw, Bounty

Everybody a cuss say Bounty Killa wear him boxers go perform a stadium. Unuh too wicked. Bounty, I are like your shorts. It remind me of the Reggae Boyz - always comin up short. Bounty, a yuh say summer body, a yuh say legs must show cuz donkey nuh bite yuh. Hot body Rodney, mi like it. Mi a go want up yuh body.

Red paint pon Bob?

Mi pass out a Bob Marley statue wha day ya, and di whole a di statue full a red paint. Di people dem claim say a di Costa Ricans dem dash red paint pon di statue. But tan deh deh, dem people deh couldn't so brave? Di one likkle goal dem score, and dem wudda a gwan like dem a real country? Mi never even memba bout Costa Rica till match time.

Tuffy fi prime minister!

Tuffy fi prime minister, Tuffy fi contractor general, Tuffy fi govern over Goat Island, we want Tuffy fi be the leader of everyting. When Tuffy stretch out him foot an push in the ball inna the goal, mi know say Whitmore heart must drop a grung. Mi nuh know if you a go get nutten from Government, but as of today, I declare your new name to be Sir Tuffy Tuffington.

Call him name, Mavado

Mavado, call di name a di politician whe have yuh money. Bawl out him name mek di whole a Jamaica know cuz if a did you owe him, dem wudda take whe yuh visa, yuh house, yuh car, you gold chain, and di whole a yuh money. Call name so we know a who.

Artiste sprawl out

Mi open up mi email yesterday and mi yeyeball dem nearly drop out. Mi see a pic of a certain artiste sprawl out inna bed inna boxers wid him piece a him teely a heng out. Wha mek unuh must try assault people yeyesight. Wha people do unuh make unuh a try blind dem. Mi a go start collect donations fi buy some a unuh some proper clothes.

Weh Whitmore?

Anybody hear from Whitmore? Anybody see Theodore 'Taps' Whitmore? Calling Tappa, paging Tappa, please report to the front of the Reggae Boyz bandwagon.