What a way dem deh pon Roger Clarke name like white pon rice, chu di man a exercise him right fi dance.

Now mi naa tell no lie, di big hullabaloo weh mi hear some people a mek over di dance, mi really haffi wonder if a di same Jamaica dem live in yah wid all the real problem and stress dem that plague us everyday.

We have from crime stress to high cost a living stress to high bills stress and all man stress a plague we because many of our men have migrated to other pastures! Mi naa lie, mi no see nothing so leud bout the dance mek everybody a nyam up demself so.

A wah a chu him have a one pack and not a six pack? A chu some a dem a seh him neva dat cute when him a wine, so a dat bun dem or a chu because him did deh pon tippy toe inna di picha?

Well, whatever it is, mi haffi give him kudos because nuff handsome flat belly bwoy a road wid dem six pack cyaa bubble so! As a matter of fact, nowadays, when woman go a dance we haffi a dance by weself becuase the man dem hitch up inna one corner by themselves, and all into themselves.

worse mistake

When you do give some a dem a one dance a di worse mistake eva cause nuff a dem no have no riddim, no pattern, and no style! Nuff time, as woman, we a kill out weself and buss some wine til all di false hair out fi drop off a we head, and if yuh have in false teet and open yuh mouth to how yuh inna di winery dat will drop out too, and when yuh glance backa yuh di man jus' stan up like a piece a ply board jus' a brace yuh!

Nuff man come in like partition, so when mi see Roger fold over and a enjoy the merriments mi cyaa wrong him at all! Unnu can imagine me and Roger Clarke a bubble?! Sas crise dem woulda haffi call out Renato Adams outta retirement cause dat deh wine deh woulda cause pure problem! Riooooooot! Fadda God, if yuh no busy, look yah!

Of course I'm all for persons observing and respecting their posts and privilege given to them but at the same time ... time and place and context is also important. Dem say a picture can say 1,000 words but memba a can 1,000 words of lies and misrepresentation.

excitement

When I interviewed the minster, he said he was at a party and was merely enjoying the excitement and frivolity that was in the air. Him seh him and the lady deh deh a dance good good and then she just start back it up pon him without warning and being the robust man that he is, him neva did ago "back" from that. He said it wasn't for any prolonged period as many may think.

But happy to say, him a be a good sport, and I really admired that because sometime people want us to take ourselves so seriously that we forget to have fun and just laugh sometimes. Mi hear a woman a ask if him wife no feel anyway but to me when yuh marry a public figure especially one as fluffy and fun-loving like Roger, certain tings come wid the territory, and to be fair, him neva did a do anything too bad ... at least dem neva photograph him inna di same position inna him socks only! Now dat would be annedda story.