Everybody wine and do di one drop, drop, drop drop. Yes, QQ, you find it again. Yuh tun all big man now. Yuh song dem just a get suh raunchy and bere tings. Mi like how you a mature. When me see you a sing certain song mi feel very uncomfortable because mi still see you as a likkle bwoy doing di rum-ram. Mi memba when you did do song wid Pamputtae bout small axe cut dung big tree. Mi nearly jook out mi yeye dem wid a plastic spoon. Anyway, memba fi send unuh email to lattygoodaz@hotmail.com.

Gucci down to di socks

Elephant Man, mi waan know if you have a personal Burberry and Louie V store in a yuh house? Sometime mi see you in a some clothes and is like a you dem mek it fah personally cuz dem nuh sell nowhere else. Your dressmaker must make nuff money off a you because a you say Gucci down to all a di socks.

Mix-up artiste

Mr Artiste, why you name so easy fi call? Why as likkle mix up gwaan a your name first dem mention? Di people dem say dem book you fi show a Europe and you took off like lightening bolt wid dem money. Mi nuh know if a true or a lie, but you need fi go wash off dung a mineral bath. A bere crosses always a reach you. Memba seh dem a tek weh visa left, right, and centre, so try nuh make no more mix-up reach you because you need di visa.

Sanjay a get likkle better

Sanjay Ramccham-whatever-yuh name, mi like how you a try improve the image, BUT ... last week, mi see you in a green vest and mi a wonder a how much grung lizard dem kill fi make dat vest. Don't wear it back.

Weh di artiste dem deh?

Whole heap a artiste deh pon vacation? Or dem voice lock up inna prison wid Kartel? A only one set a artiste mi a hear pon di radio and see pon di charts. What is happening to di rest a unuh? A Worl Boss unuh a wait pon fi come out a jail?