Mi seh to how di year a run fast is like it inna stiff competition wid Usain Bolt who a run fi dear life from Tyson Gay!

Mi cyaa believe seh di year reach mid way already, mi new show pon Nationwide 90 FM and Link Up radio inna New York and the Tri-State area start an it tun up loud and di summer deh yah and as yuh quint a Christmus!

Mi know fadda God soon come fi him worl because the mount a injustice and unfairness waa gwaan pon di land yah it need cleansing! Mi happy fi all a who tune in to listen mi show and mek sure unnu spread di word yaad and abroad!

Di latest wid the sentencing of di "married man" inna di young lady shooting case has been on the lips of everybody who is anybody and it wake up a ants nest a grief and cross-niss inna my heart fi some people who stay one side and a launch all accusation pon the young lady because according to dem a she "tek di married man" so she get what she deserve!

Now unnnu know when me hear all dem ting deh mi get inna spirit instant because nuff a di so called "wife" dem not talking the truth. Nuff a dem naa walk and tell people seh dem "husband" weh dem have don't like dem and barely chat to dem. Inna nuff house the husband and di helper have a better relationship than the couple themself. Dem quick fi talk seh dem an di man deh fi 15 or 20 years and dem naa talk how di man dem only like dem fi three months outta dah time deh.

Dem naa tell people seh dem an dem "husban" live like room-mate him in the back room an she sleep inna di front room and it's been a while since she see him one-eye serpent to the point where she gooda all grow a third nipple and him would'nt know!

Nuff a di 'wife' dem naa talk seh the only reason why dem 'husban' walk down di aisle is because of the duppy weh she set pon him push him down deh! Nuff a dem obeah di people dem nice clean bwoy pickney dem fi get ring an a gwaan like a all natural love! Dem haffi wake every 6 o'clock, every 12 o'clock an bun di black candle an have him name pon parchment paper inna di freeza or inna dem shoes a walk him down! Yes mi try di case an bruk di pencil an find out seh nuff a dem a wife liad!

Everybody always quick fi blame di woman say is the woman fault cause a she tek him. But stick a pin deh normally when yuh 'tek' smaddy yuh tie dem up and kidnap dem otherwise from dat a him go deh! Mi hear a man seh "a dat fi reach some a dem gal yah because when yuh tell dem say yuh have yuh wife dem waa get nuff and mash up yuh life a yuh yaad"! Which part mi did deh mi couldnt get fi daab up di piece a ole clothes because to how him ugly an stay bad not even mother him shouldn't have much less wife and gal pon di side! Him ugly an fava Friday di 13, 14 and 15!

different introspection

But when mi hear him seh so it ring a bell inna mi head and put mi pon a different introspection. One weh mi used to seh "mi no tek gal man mi tek ova" but right now I don't want tek ova I just a tek we miself! Because nuff a di man dem a Judas and Bealzibub inna one. Dem sell di woman dem a hard luck story bout him an him 'wife' how dem separated or dem just there for the kids or she is not really his type but him just a sort out a ting or some other story weh dem craft up to get di nookie.

When trouble strike an ataclaps happen dem ready fi jump an seh "but mi did tell u" or "but yuh did know" and then the world of judgement fall on the female. Mi only daab up di moutain goat gal dem weh waa nuff up an gwaan like yuh an dem inna league an mi no run dem joke deh ... cause anything di man a tell yuh don't mek it fool yuh fi cross di line!

When mi a read the evidence mi cry fi know how the heart of man wicked. Nothing behoves another person fi tek a person life and to sit an say "a dat dem fi get when dem tek married man". Mi can tell unnu a nuff slip between the cup and lip and unless yuh have inside information don't be quick to judge.

God and his angels did their part to protect the young miss and her unborn child at the time and I hope the state will follow through and do its part. So ladies try as best as possible, even though some a di man dem mouth sweet like sugar an dem have all a di 'spiderman' moves fi drop pon yuh, fi tek weh yuhself if yuh can before him tun a black widow spider pon yuh!