A so me tan, a so me tan, a so me tan. Do me owna ting and mi nuh follow back a man. A tru mi trod my owner path, dats why Latty Goodaz boasy nuh .... Latty Goodaz boasy and stay good cuz mi nuh sponge pon people. Mi love how unuh a flood mi inbox every week (lattygoodaz@hotmail.com). Big up unuh self.

Do you ting, Shawn Storm

Speaking of Kartel, every week mi tell unuh say unuh fi memba Shawn Storm and mi finally hear say him have plans fi restart him career. A one degge degge Shawn Storm song mi know bout, but if him say him a go restart it then mi believe him. Mi hear say all video a go shoot fi him latest song ... Mi nuh too understand dat cuz it nuh make no sense to me. Unuh a go shoot video and him nah go in deh?? Do you thing Shawn Storm.

Killa birthday a go tun up!

Kaboom!!! And just like dat Killa ready fi run di place again. Mi hear say Killa birthday party a keep this year over Sugarman's beach. A bere excitement from di news drop. Di ladies dem a run go look bath suit and di man dem a get ready fi go look pon di woman dem. Yes Killa, you a di General. Beach party you go dis year because you money nuff. Dem a say you bruk but dem nah see you suffer. War Lord at dem fi 2013.

RDX vs di dancers

From the story drop wid RDX and di dancer dem last week everybody start tek side. Some people a say RDX never haffi style di artiste dem so and deal wid dem so billias and other people a say some a di dancer dem need fi look a regular 9-5 work. Wha unuh think ... email me and tell me.

Who lef inna di Gaza camp?Kartel say a Gaza forever but it look like a nuh everybody memba dat. Worl Boss send out a letter say Popcaan and Tommy Lee betray di Gaza boss. People did already know say Popcaan and Kartel never too deal from Kartel get lock up, but everybody shock bout di Tommy Lee part. A wha really happen?? Wha Tommy Lee do??? Den if Kartel say Popcaan and Tommy Lee betray him, who lef inna di Gaza camp?? Only Gaza Slim???

Unnu sell out!

A likkle birdy drop inna mi email and say everybody sell out fi likes. Di people dem say because some a di industry people dem love likes and dem licky, licky, dem nuh stop follow behind people like say dem a butler. Hype, and a follow behind people fi tings? A when since a dat dancehall gone to?