Bless up all mixup linky-linky an mi Tambareen Radio family. An propa big-ups to all a mi linky dem ova mixupyaad.com. Bless up unu self.

Mix-up time:

Raga, mix-up, big up to the schoolgirl weh live pon mi avenue in a Duhaney Park, weh we call 'under di bed'. Raga, she use to deh wid dis so called Christian man weh married, and have him wife and kids. Raga, dis man always a meet her few chains away from her yard and always a carry her guh bus stop and all guh lay wait her a fi her bus stop when school over and escort her home. A Friday nite time him use to dress and come fi her and carry her guh KFC or Burger King guh full her belly. Mi remember one day him come to mi come ask mi if mi can change a Shearer cause him want gi di girl her lunch money. Mi nuh mek him nuh wiser, mi change it.

Raga, one nite she mussi come from school late and mi see him collar her up pon di avenue and bax her up. Somebody si and guh call her mada and when she come him run her weh too and start style her. Him wife start pick up one and two tings and she start walk pon my street regular fi si a who people a tell her bout, but she never lucky fi buck di two a dem yet. Di man start get brite and start carry di likkle gyal guh a di house weh him and him wife and kids share. People start watch him hard but anytime di wife come home fi run een pon di action di likkle gyal always M.I.A.

One mornin di wife did plan fi dem. Da woman deh never tell me mornin yet and dis woman pass mi pon Waterhouse Drive, and tell mi a sweet good mornin deh til mi a seh backside a wha dis now? Mi a wonder if a fren dis woman want come fren mi fi find out something. Raga, two twos a di likkle gyal dat pass mi inna a piece a brider, and mi seh "what a la la". When mi look a di woman husband dat mi si cross di street a wait pon her. The two a dem hold hands and walk guh to the man house. Half hour later a di wife dat mi si breeze pass mi and a chop some cloth, till me a seh a di Christian dat a reel out dem fabric deh? Raga, di woman move een pon dem but him look like him did hear and hide di gyal under di bed.

Suh, di wife guh si him with a erection and ask him a wha a gwaan? Him tell har seh him did a back him fist. Suh same time di wife start search dung di place and notice seh him nuh stop look under di bed, suh di wife ask him a wha under deh? Him seh nothing. Raga, di wife draw weh di bed and si di likkle gyal! Raga, she beat di likkle gyal, and she beat di husband and bruk him foot! Di classic part bout it is mi hear seh all in a toilet bowl di wife all have di likkle gyal face. She tear up her clothes and call her mumma fi come fi her. Hussy couldn't do a ting cause a regular mi hear seh di wife beat him. When crowd draw and di gyal mumma come fi her, di wife start dash out di man clothes. Di husband weh a Christian start talk up di tings dem bout she nah swipe him suh him haffi guh weh him a get di swipe. And him seh di wife ca'an wine pon him ting good and she nuh know nuh style. Raga, di wife box him up and kick him pon di foot weh swell up a when him bawl out people realise seh something wrong wid di foot. A she same one did haffi carry him guh Public Hospital cause him couldn't walk pon it, a suh dem realise seh it bruk. Nothing nuh sweet like him and him wife now. Raga, yuh want si dem a step out guh church a Sunday mornin time. Chat bout!!

Waaaiiiieeeee!!! Drama! But da bredda deh too bareface wid him ting. How him a loud up him movements soh? An mi jus' hope seh wen him did staat roll wid 'unda di bed' she neva under age - cause we naa support or joke bout di underage ting. But him a nuh soldier inna di ting, cuz him obviously nuh know how fi screechy. Him all a bruk a very important rule fram di Ragashanti School of Bunning - Neva bring di bunnaman or di bunnawoman inna di house weh yuh live wid yuh man or yuh woman! Dat jus' always increase di chance seh yuh a goh get ketch or people a goh inna yuh bizniz.

Anyways, straight blessings to him an him wife a goh church togeda again an a buil back. Bless dem up.

Awright, unu sen mi unu mixup dem. Link me at ragashanti@mixupyaad.com.

Cutmentz.