One more week pon di bugger dem, dem nah go live fi see Latty Goodaz bruk again. Yes, anyting Latty Goodaz say she can defend dat. A suss time ya now and mi know unuh a wait fi mi leggo di drama pon unuh. Continue fi send in di suss to lattygoodaz@hotmail.com. Big up who fi big up and all who nuh like me can chuck off!!

Scammed!

A how di big bad radio station out a order so? How dem fi put up dem tings deh bout Elephant Man and dem not even call di man and him manager fi get a quote? From mi read di story pon dem website mi know say something nuh right bout it because mi nuh know why di gardener wud da deh Elephant Man yard 11 o clock a night ... him is a live-in gardener? Second ting, Ele live inna apartment now, wah him wudda need gardener fi do? And before me lef, unuh need fi do something bout dem ads deh whe unuh run. Unuh play three minute a music and den 27 minutes of advertisements.

People, mi rate dah artiste ya ... Mi rate him bad cause him always talk whe him feel like and nuh business whe nobody want say ... But when mi read say him get scammed because him send money to somebody who claim say dem name Kartel mi never too shock. Make me ask unuh dis ... if Kartel did inna prison and him need money fi lawyer fee ... Unuh really think say a dat deh artiste deh him wudda call? Secondly, how mi still nah hear nobody a talk bout send money fi Shawn Storm? Unuh nuh memba say him in deh too? So people a try free Worl Boss but not Shawn Storm? Unuh too wicked

Artiste a box dung people!

A which artiste name Doza Medicine? A whe him come from? Mi read THE STAR and hear say them a accuse him say him give a 17-year-old girl two Gaza box because she say him a iron balloon. A so life hard inna di industry? Artiste all a box dung people fi talk the truth? After a nuh lie she a tell ... IRON BALLOON DOZA MEDICINE why you do dat to di girl? All you need fi do is find a hit song enuh cuz when money start make all a di girl dem start tun groupie. So make a hit song and den draw back fi di same catty.

How dem so hype?

Go hard, Jonnah and Sassy Silva

Big up Jonnah and Sassy Silva who won Magnum King and Queen fi di year. Unuh go hard dis year, mi nah lie. Mi hope say unuh get a buss inna di industry and dat unuh nuh use the million dollar pon foolishness. Make sure unuh have a good management and PR team cause whole heap a people a go run in now because dem want a share a di million dolla.

Bway, from some man career revive wid few likkle songs, dem just hype suh. Di people dem say unuh hype now and a dash word pon people. Memba say Jamaican people nuh like dem sumting deh. So unuh please shape up unuh self.

Out a order station