Wooooiiiii ... mi chest plate a bun me. Mi nah spend no time wid mi man but him still nah gimme bun. A baaay, Latty Goodaz have di haffi come back. Some people say dem tun up but mi nah say so cuz if you sumn can tun up, it must can tun dung. A mi say grip right!! Big up all who fi get big up and all who nuh like me can go chuck off pon a feather. Memba fi email me at lattygoodaz@hotmail.com

Killa a you run tings

People Deadddddd!!!!! Mi say Bounty Killa tun up Behind the Screens Tuesday night. Mi hear say Killa get cross, angry and miserable pon dem up deh. How dem fi have the Warlord a perform and dem nuh sort out him mic? Killa just fling whe dat and make dem know say him nuh run joke when him a perform. When Killa start chip di bad wud dem, di whole place shell dung. Bounty Killa a you run tings now but memba say Kartel soon touch road again.

Bunting in the Garden hiding

Peter Bunting in the Garden hiding, hiding, hiding, Bunting in the Garden hiding, hiding from the thieves. Bunting, where are you? Di whole Jamaica tun over Sunday when it was reported say Bunting get robbed. Everybody and dem granny a bawl and say if di minister a security caan secure him owna self, how him fi secure di whole a di country?? Bunting say a nuh him dem rob, a some other people who were staying at the villa in Portland. Di dolla deh US$99.08 and Bunting deh Portland? Mama P, di people need answers.

Soca vibe tek ova

Di whole place inna di soca vibe, even di people dem who beg and borrow fi buy costume and dem house empty so till, not even fly want go in deh. Mi see Digicel a keep J'Ouvert tonight and Lime jump up and a keep Pandemonium tonight too. Digicel fly dung Destra, but Lime fly dung Machel, Patrice Roberts, SuperBlue and Farmer Nappy. All Shaggy mi see pon di line-up. Mi not even did know say him know nutten bout carnival, but from a di egg, Shaggy inna di red. J'Ouvert has paint and Pandemonium has coloured powder. A which one a go get di crowd?? Next week mi tell unuh a who win di soca war.

Night shift loving?

A who dem say did a give di artiste girlfriend some sweet love pon di night shift? Mi get a email and from mi get it mi just haffi bawl out and say mi "chest plate a bun me". A wha kinda mix-up dis enuh di industry? Earth a run red fi tru.

Hot artiste a TIEF clothes?

A who say dem a hot artiste and a TIEF clothes? A who a work obeah fi get a hype?? Latty Goodaz hear bout unuh. Wait till Jah hold unuh.