Tambareeeeeeeeen!!!! Big up all T-Fambily linky-linky an all Mixup massive. Rrrrrrrrrrrrrrrr!!!! An big up all a mi mixupyaad.com bredren. Di mixup dem a buck! A bare laugh unu a mek mi laugh ova deh.

Mixup time:

Fake Hottas

A woman deh pon di New York subway an see dis girl from har area come pon di train. She say she know har as one a dem hot gyal weh always deh a di top dance dem, inna bare name-brand clothes, an always a talk up a bag a tings inna di video dem. She say a regular she done gyal inna tracing, a mek dem know a bare top man want har, an how she shop a 5th Avenue an bare tings.

She did a wonda weh she a do pon di train if she a gyal weh always a hype. She say she neva tink nuttin of it really, cause inna New York a whole heap a millionaire actually tek di subway, and besides, she really see har nuff time inna some hype car wid nuff top man.

Anyways, she say she did near to di back door pon di train weh lead over to di other car (which is anoda section a di train). Wen di train empty out likkle bit she notice say di hot gyal deh way down to di oda end a di section a di train. Den a white lady goh siddung beside di hot gyal. Di white lady look like one a dem supa model - good looking, dress good, wid har swag a buck. Di white lady tek out some food an staat eat. She den notice say di hot gyal an di white lady staat talk. It look like di conversation did deh pon di food weh di white lady a eat, cause she notice seh di white lady keep on a point pon di food wen she a talk to di hot gyal. Di white lady den goh eena har bag an come out wid more a di food, weh did wrap up inna a see-through plastic, an staat point pon da food deh too, an still a explain supm to di hot gyal. Di hot gyal look like she did frighten fi di white gyal, cause she did a speaky spokey an a gwaany gwaan inna a way weh nuff Jamaican butu gwaan wen dem a prims up pon boasy people.

Di white woman den tek di second food weh she tek outa har bag an rest it rite beside har pon di seat. Di food did still eena di plastic. Den di white woman an di hot gyal chat fi a while. Suddenly di white woman realise seh di train did deh a har stop, soh she tell di hot gyal bye an run tru di train door an gaan.

Di girl weh a watch dem notice seh di white woman did run out lef har food pon di train seat. She neva tink nuttin of it, she jus assume seh a same place deh soh it a goh lef. But den she notice seh di hot gyal see di food too. She seh di hot gyal staat look roun pon di people dem inna di train weh near to har. Di girl weh a watch dem say she did deh way down a di oda end, soh di hot gyal neva did a pree har. She say usually she wouldn't a look all di way up deh soh needa, but dat a jus because she know di hot gyal fram har area mek she did a look all di way up deh an a watch har.

She say wen di hot gyal feel say nobady neva did a watch har, she jus neatly slide har han ova an tek time tek up di food an gently put it inna har bag!

couldn't believe

Di girl say she couldn't believe it! She say all kind a tings run tru har mind fi try an explain why di hot gyal tek up di food. She did a wonda if a supm supa special di white woman tell har bout di food mek she tek it up. Or if she did jus hungry. She jus couldn't believe it. She jus couldn't believe seh dis a di same gyal weh always a cuss people seh dem a nuh nobady an always a talk up inna video bout weh she have an how she a live toppa top life an bare tings. An look deh, she tek up food offa subway seat weh di white woman lef.

Unu done know weh Lady Saw call some a dem: HOT an HUNGRY!

Mi nuh shock though. Cause mi can tell unu mixup afta mixup bout people who have di biggest chat, an have all kinda hype tings - but if unu eva know weh dem haffi do fi get dem. Not to mention di people dem who hype pon di road, hype a dance, an if yuh goh a dem yaad yuh see seh dem a live inna some breed a nastiniss weh mek yuh tumuck sick! An some a dem hungry nuh claat, all a beg phone card everyday. Dats why mi nuh frighten fi people wid dis an dat, an people who always a show off bout wa an wa dem have. Cause some a dem have di tings dem, but di muscle dem inna dem jaw cawna wear out, an some dem front door cyaan shut, not to mention dem eva-open back door, an some a dem have all kinda hole pon dem body weh a bun dem.

A me say humble. If mi cannot afford it, mi do widout. An nobady naa clown dis fi likes. An nuff a unu need fi do di same.

Sen me some good mixups at ragashanti@mixupyaad.com

Awright, mi a cut ya now. See unu same place yah soh Thursday.

Bless up unu self. Mixupyaad.com fambily bless up unu self.

Do road.