A me good nanana make him haffi come back, haffi come back, me say him haffi come back!!! Big up Cherine Anderson, dah song ya baaaaaaaddddd. Some gal vex cuz di man nah come back!!! Latty Goodaz deh ya and mi haffi big up all the Goodaz family! Big up di St Bess peeps and bless up yuhself Cydefex Records!!! Memba fi email me at lattygoodaz@hotmail.com.

Congrats, Aidonia!

Country a run red!

Big up and congrats to Aidonia and his fiance on the birth of their son. Donia all write song bout it already and bere tings. Mi like when man own up dem baby and take care a dem because some cayliss dutty babyfada deh a road a floss and dem baby deh home a drink Lasco!!! Big up yuhself Donia. Nuff ratings from Latty Goodaz.

A how the country a run so red? Gunman a kill baby and grandmother, police man dead during training session, US dollar a go up and no money still nah run? Mi really a fret fi Jamaica cause a nuff likkle tings a gwaan, and mi nuh see wha Government a do fi help we ... Poor people a suffer!! We need Mama Portia, we need help!!!

How unnu so lie?

Mi never know say people still a tell lie inna 2013. Mi see people a put up status say dem deh Jazz and Blues and a mi and dem buck up a one party Satday night. Unuh well a put up picture bout how John Legend a shell di place when unuh know say unuh never even pass out a Ferry much less fi reach a country. Unuh a wicked!! How unuh lie so??? Unuh nuh fraid a God?

Question time:

A which artiste dem say a walk pon parchment paper and a hug up wid di monkey just fi get a buss??

A how some a unuh a bruk unuh neck and a buy carnival costume (whe unuh nah go stay good inna anyway) and a spend how much money fi go a Trinidad go wine up and unuh know say unuh caan afford it cuz a only crackers and wata always inna unuh house.

Why Asafa nuh stop mad di woman dem pon Twitter!?? As di man post a picture a bere woman run in and swarm it!!! Mad dem, Asafa!!! U body able!!!

Expensive artiste

A how some a dem artiste ya a charge so much money fi show??? Mi fren say him want put on a stage show and when him link some artiste, is like a house dem a try buy out a di one show. Mi granny always say craven choke puppy and mi realise say a true!!! To how unuh licky licky fi money whe unuh KNOW say unuh nuh deserve, nobody nuh waan book unuh. Unuh a go start drink wata and nyam cheese trix till unuh change unuh dutty ways.