It's FRIDAY, so you know say Latty Goodaz deh ya wid di suss pon har eyelash cuz mi have di whole a dem secret inna stock and pile. Memba fi send on unuh email to lattygoodaz@hotmail.com. Big up all a di Goodaz family whe send mi dem suss a week time. A we say back broad like shutter. We nuh frighten fi nobody.

Spanish Court a di spot

It look like say Spanish Court Hotel a di new place fi di celebs carry dem side piece dem go. Mi hear say di artiste roll up wid him side chick and just step thru the hotel door. Mi nuh know wha dem in a di hotel room a do bcuz di young girl dem say him heart willing but nuttn much is there below to work with.

A when Killa tun bad man?

As me get it a so me talk it cuz none a dem artiste ya caan make dem entourage step to Latty Goodaz or jump inna me chest an stop mi heartbeat. Mi hear say a likkle stage show keep down a Riverton. Artiste down deh and ting and Tommy Lee tek the stage and a perform. Mi hear say inna the middle a Tommy Lee set, Killa and him entourage rush up pon him and say a time fi Killa perform now. Mi hear say Tommy Lee take weh himself quick, quick. But stop right deh so, a when Killa tun bad man? Killa, how mi never see you rush up pon stage when Kartel up deh a shell you dung? A Tommy Lee you have strength fah? Mi hope Laing have Killa money ready bcuz it look like Sting finally a go get back a hype.

Angel roll deeper dan dat

From weekend mi see people a talk bout D'Angel and Buju son Markus. Mi never believe it from mi hear it cuz mi know say although Markus a gwaan wid a ting now, him nuh reach D'Angel level. Memba say Angel love shop and go farin and hype enuh, mi nuh think Markus money reach dem level deh yet. Mi more wudda believe it if dem say D'Angel deh wid Buju cuz you know say she roll deep.

Obama stan up firm inna di White House

In the case of the USA, Mitt Romney, you are NOT the president! Lawd jesas, look how Obama stand up firm inna di White House. Romney did a try hard fi reach in deh, but mi like how the people dem come out and vote and make sure say Obama in deh fi four more years. If Mitt Romney did ever win, a only TV some a we wudda get fi see farin pon.

Artiste cyaan mine him pickney

A which artiste a gi dem baby madda $5,000 every YEAR? Which artiste ever a hype and inna war wid people and can only scrape five degge degge thousand dolla fi him baby. Unuh listen to me, Latty Goodaz nuh inna dem tings deh. Unuh fi mine unuh pickney. Every day unuh deh studio a buy food and liquor give unuh entourage while unuh pickney dem a starve. Listen to me, fix up unuh life because if mi nuh hear say money run fi di pickney dem Christmas, mi a go talk di tings dem!