Tambareeeeeeennnnn!!!!! Wa a gwaan peeps?? Me say dutty Sandy up ya inna Obama Lan a gwaan bad!! Wat a gyal cyaliss!! Noooooo sah! Afta she kill off people inna di Caribbean di gyal come up ya wid one bag a rain an wind an a destroy everyting she touch. She jus a blow soh. Me nuh believe inna obeah but dis ya hurricane well strange. But right ya now me not even a goh bada rest pon har case, cause me have oda tings fi chat bout.

But before me do dat yuh know me haffi first big up me Tambareen Fambily an me Mix Up massive. Blessings indeed. Cause a me say manners. Mi mumma raise me wid nuff broughtupsi. Awoh!

Awright, mix up time now:

Di Artiste dem an Swiping

Any a unu eva siddung an notice say di artiste dem naa bun out swiping ting again? Unu eva notice say dem tek time an screechy an neatly stop bun out swiping.

A wonda why??

One time gaan yuh couldn't listen a dancehall song widout hearing di artiste dem a bun out di gay ting an di swiping ting. Every dance yuh goh yuh hear bout who a dj pon di mike an who a blow di skin flute. Lyrics buss everyday a bun out di man dem weh love nyam CHO-CHO inna dem soup. Dem always a done di man dem who a tun dem face inna chair. Fire did a bun pon di man dem wid di stool face. An me cyaan tell yuh how much time mi hear artiste a done di man dem who nyam burger an den a clean out hair outa dem teet. But now we nuh really hear nuh new lyrics a bun out swiping again.

A wonda why??

Of course di artiste dem pretty much stop bun out di gay ting too - but we know why dem stop do dat. Dats because di homosexual organisations dem step to dancehall wid a whole heap a pressure and, consequently, dem decide fi lowe out di bunning out a di gay ting.

But no organisation did pressure dancehall artistes fi stop bun out swiping. Dem just decide fi stop soh. It very hard now fi hear a artiste mek a chune a bun out people weh a put dem mout deh soh. Yeah deh soh. Same place deh soh. No more chune a mek a tell yuh say yuh noh fi put yuh mout deh soh.

A wonda why??

Me all hear say some artiste woulda waan goh back goh publicly bun out di swiping ting, but dem cyaan dweet wen some woman inna di audience a look straight inna dem mout. Mout say some artiste bruk up dem relationship wid dem girl an waan done dem girl inna public, but cyaan dweet.

A wonda why??

Some a di goodas dem all a chat say nuff a di artiste dem nuh ongle jus good wid dem mout wen dem a spit lyrics. Di hottas dem say nuff a di artiste dem have some mout deh weh well multi-talented.

A wonda why??

Artiste wi all deh roun people who a talk openly say dem a swipe an dat dem love swiping, an di artiste dem won't even pay dem nuh mind. One time gaan di artiste dem woulda staat immediately bun out dem people deh an bawl out "gun shot fi yuh!!" an "run weh fram ya soh!!" - but dat naa happen again.

A wonda why??

An di public also a do di same ting weh di artiste dem a do now. Yeah di people dem who used to boost di artiste dem fi bun out di swiping ting, stop boost dem fi do dat. Fi real, di Dancehall population pretty much inna di same boat as di artiste dem - everybody naa too bun out swiping again. Not even di selecta dem a bun it out. A bare joke a run bout it.

A wonda why??

A wonda why??

Yuh know wa, mek me shut up before mi mout get me inna trouble (not inna da way deh lol). Unu notice say me jus goh outa me way fi write 'not inna da way deh'??

A wonda why??...

DWL!!