How di mosquito dem a gwaan so bad from wah day yah?! No sah, is like dem a wear bullet-proof vest and a tek supplement because dem a go real hard! Some a dem big an black so til is like dem have TRN and driver's licence!

One time gone when u box offa mosquito dem flee di scene but of late dem a go one different college weh mek dem brazen so til all chu yuh clothes dem a bite yuh!

Yuh coulda shake yuh foot likkle more, from dem decide fi bite out yuh warra warra, dem naa leggo and all days afta dem bite yuh an gone dem ways di area still swell like is a dawg bite yuh get!

Jah know from wah day mi seh mi aggo buy a net an walk wid it fi try an protect miself because mi cyaa manage di bump an fassy fassy weh dem super-mosquito yah a deal wid!

Chu dat dengue deh pon di rise and seemingly a tek a hold inna di place. Mi hear bout several cases where people admit inna hospital and it is especially troubling because the kids dem a feel it.

Nuff people tink seh dengue a something fi ramp wid or tek light but it is no joke matter at all.

Dengue can kill yuh!

One big film director from India just dead from it and so we need fi tek di matter in hand more aggressively fi try and cut di spread of it.

social campaign

Mi tink di government need fi embark on a more urgent social campaign fi educate people as to the detriment of dengue and why it is everybody business fi tek di matta in hand.

Mi notice seh certain areas naa get no attention an naa get no spraying. Dah spray gas sumting deh need to be done islandwide an need fi penetrate areas near gully an dem way deh.

Pamphlet and other educational material need fi start circulate so people can be informed as what to do and what not to do.

In the same token people haffi mek demself aware as to what a gwaan and tek di necessary precaution fi protect dem health.

Mek sure di gully dem no litter, mek sure no container fi gather wata no deh bout, mek sure hole inna di flowas pot dem, mek sure if yuh have wata drum a yuh yaad no mosqutio egg no in deh, mek sure di surroundings clean an mek sure di house lock up before di pestilence dem come dung!

death stage

Some Jamaicans have di tendency fi waa diagnose demself without going to di docta even though dem neva go a medical school!

Dem eva know wah do dem an wah fi tek til it reach death stage dem a run go hospital fi stress an already stressed health care system.

Dengue come wid certain symptoms like fever, headache inna di front portion a yuh head or behind di eyes, muscle or bone pain, nausea an vomiting and loss of appetite.

More needs to be done to sensitise the country about what is going on because a likkle epidemic a creep up an mi no sense dah urgency an alarm deh wah shoulda be going on.

Dengue Haemorrhagic Fever anno sumting fi ramp wid an it haffi get under control now!

Mi gone rub some mosquito repellent pon mi body cause mi nuh waa dem come bite off mi fluff!

"Yuh coulda shake yuh foot likkle more, from dem decide fi bite out yuh warra warra, dem naa leggo."