Tambareeeeeeeeeeennnnn!!!! Mi did jus feel like fi bawl out dat. Lol. Wa gwaan peeps? Unu good?? A hope soh. A hope a bare good duppy a falla unu. An unu fi mek sure nobady naa sprinkle nuh oil an nuh powda roun unu. An doan believe a ongle ghetto peeple an country people sprinkle oil an powda, cause unu woulda frighten fi know how much uptown boasy peeple a wuk dem guzum.

Anyways, big up all a mi Mix-up linky-linky an all a mi Tambareen Fambily. Bless up unu mix-up an blenda self. Mix-up time now!

Unda mi Nose Bun

A bredda an him bredrin always a par. Di two a dem married to dem good-good wives, an di two a dem a truck driver weh always deh pon di road a work fi weeks. Di bredda always ova him bredrin yaad. However, him bredrin wife doan like him cause she say him always a bun him wife. Him a bun him wife fi true and even bring him side girl dem ova him bredrin yaad all di time. An a soh wen him bredrin wife always a see di side girl dem she end up a cuss har husband say him fi stop keep him as a fren cause him a dutty bunna husban who nuh mean him wife no good.

One night, di bredda a carry one a him bunna gyal dem goh a one hotel fi sort har out. Wen him deh a di check een counta him see a ID weh somebady accidentally lef. Wen him look good him frighten wen him realise say a him bredrin wife! Him tek time tek up di ID an cut wid him bunna gyal goh up a him room. Him den shot di sort out quick quick wid di bunna gyal an carry har home. Him circle back a di hotel an search di parking lot fi him bredrin woman car. Him find it an decide fi siddung inna di parking lot fi see who she a goh come out wid fram di hotel. Him say him did bex, cause him know him bredrin did deh pon di road a drive fi two weeks an obviously have no idea weh him wife a gwaan wid.

Likkle afta that him see him bredrin wife a leave di hotel well lovey-dovey wid a man. Him recognise di man as a yute weh him did see a one a him bredrin barbecue. Him bredrin wife did introduce di yute as har cousin fram di state of Georgia who did jus come up a New York! Him bredrin did all a rate up di man as family, an all a feed him an a be nice to him an a gi him drinks. An now a di same so-called 'cousin' di wife did a leave wid fram di hotel. Obviously, a lie di wife did a tell an di cousin was har bunna man.

Wen di wife a move to har car di bredda jus mek sure she see him. Di wife get shock an frighten an staat gwaan like she waan tun fool. Di bredda jus lef di parking lot an go home. Rememba now, dis a di same wife who did always a cuss har husban say him fi drap him fren cause him a bun him wife - an now it obvious say all dis time she a bun fi har husban!

Di wife nuh stap blow up di bredda phone a beg him fi nuh tell har husban. But di bredda do fi spite an nuh ansa none a har call dem. All di wife fren a pressure di bredda nuh fi talk. But di bredda jus bex an naa pree dem.

Di bredda did a ask me weh him fi do, if him fi tell him fren. Me did staat fi a try gently tell him fi leave it alone, even though a him good fren. But afta me medz how di wife did always a done di bredda say him a dutty bunna man, an how she broite enuff fi bring di bunna man inna har husban yaad an goh introduce him to har husban as har cousin, an have har husban a work ova di grill a barbecue chicken fi di bunna man - mi jus tell him say him fi do anyting him waan do.

Di wife too wicked!! Mi always tell people say don't give bun, an dat dem mus wussa don't give bun if dem deh wid a good man or a woman. But if dem feel dem haffi give bun den dem muss dweet wid respek. Di woman wrenk like ram goat pee-pee fi a dis har husban dem way deh! Soh while me generally tell people fi stay outa man an woman affair, mi really naa goh sarry fi har if di bredda goh tell har husban.

She shoulda know how fi do har ting.