All a mi Mix Up linky-linky an mi Tambareen Fambily big up unu self. An prapa respek to all a mi Ragashanti in di Mawnin listeners up ya inna Obama Lan. Mix Up time

Helpa Mix Up

We up ya a hol a reasoning pon some helpa mix up. Den a Guyanese woman fahwud inna di reasoning an sen on da mix up ya weh she did inna.

She say years ago she get a job as a helper an a nanny fi a Jewish couple an dem three pickney. The Jewish couple white. Di wife work real hard inna har job an always a travel away fram har family. Fi years an years di wife jus always a spen most a har time away fram har husband an three children. During that time the black Guyanese woman who gi we di mix up jus always de deh a tek care a di husban an di three pickney dem. Eventually she an di husban staat to reason nuff an develop a closeness. Afta a while di closeness blossom into sexual attraction, an two twos dem staat dash out some tun up daggerring! Di sort out was so sweet dat dem jus gwaan shell it secretly even wen di wife deh bout. Di husban all sen on some good-good swiping. Di helpa say more while wen dem done do dem ting an di husban all swipe him card inna har machine, an den di wife come home - a di husban dat a greet him wife wid a good-up good-up kiss!!

Tings reach di point where di wife all staat share her home problems wid di helpa. She all tell di helpa how har husban get distant an how dem marriage naa gwaan good, an di helpa de deh a gi har advice an support - widout di wife knowing dat a di same helpa weh a gi har support a dash out har nookie pon har husban!!

Story come to bump wen di helpa bus a breed fi di husban! Yup, di husban push out di helpa naybel wid a breedmentz. Di helpa jus hol it, up to wen she seven months pregnant, before she decide say she a cut. She lef di work an di husban sort out a prapa-prapa townhouse fi har.

Di husban den staat mind har wid some good-up good-up money, sen har goh school an basically staat tek care a everyting. All dis a gwaan an di wife doan know a damn ting!!

Di helpa have di pickney an di husban tek care a di yute. Di yute a ten years old now an di helpa an di husban still deh. Di helpa, di husban an dem son all tek family vacations togeda. An di husban mek sure say him spen quality time wid him son. Dem a do all dis while di husban still deh wid him wife an still live wid har an him three oda pickney dem.

Di helpa say har dream is fi she an di man become husband an wife an live as a family. She say more while she wish di wife neva eena di pitcha, but she say she know how di ting set an she naa goh violate. She say she would neva get broite an move to di wife fi try mash up she an di husban. She say she jus know har role pon di side an naa goh do nuttin fi mash up di marriage. But she say anyhow di husban neva did a tek care a tings an neva did a treat har good, she woulda move different. But because she is well kept an a live a good-up good-up life, she naa goh rock di boat - as long as she a get weh she want.

What was interesting though is that me an di helpa ketch up inna a likkle argument about who is to be blamed fi di situation. Di helpa have it say a di wife fault, cause a she goh hire young sexy helpa fi live een an work inna har house an den pon top a dat she mek har work mek she a spen up to 80 per cent a har time away fram har husband an children. But me a argue say while we could make a strong argument say di wife did in fact luu wen she goh hire a young goodas helpa an goh mek har work mek she spen so much time away fram har home - nonetheless di helpa is to be blamed also! But di helpa still a maintain say a nuh fi har fault. Di helpa say if she was di wife who have a good man, she woulda neva hire any young hottas fi come work a har yaad, an she woulda neva stay so much fram har home. But me nuh kya!! Mi still feel say di helpa know exactly weh she did a do, an she deliberately plan har ting an deceive di wife in order fi tief di husban. In fact, while di wife have some a di blame, most a di blame must be placed both pon di husban an di helpa.

One ting though, mi know seh nuff fretting a gwaan fi all who hear di mix up an have look-good helpa inna dem house.

Fretmentz buck!! LOL!!