Prapa respek to all a mi Tambareen Fambily linky-linky an mi Mix-up an Blenda massive. Bless up unu good-so good-so self.

Awright, bung bang up inna di mix-up ya now:

Family Ram Mix-Up

People, a piece a mix up bus inna di New York ya weh a mash up everybady head. Obama Lan nuh good again!!

Hear wa,

A 44-year-old man meet a 28-year-old woman an di two a dem staat feel dem one anneda. Di vibz between dem did nice an a ting staat blossom between dem. Pretty soon dem fall in love an dem relationship a grow an a grow. Dem sort out shot like wow!! Di relationship did real an propa fi true.

Dem ting gwaan good fi bout three years until the girl decide say like how di ting a get super serious an like how dem a plan fi tek it to anoda level, dat it was about time har man meet har relatives. She carry him goh a har yaad an wen she walk een she see har aunty. Same time di aunty an har man look pon each oda inna shock! Mek we say di girl man name John an di aunty name Carol. Di aunty bawl out "John weh yuh a do ya". Den di man reply "Carol, a years now me nuh see yuh. Weh YOU a do ya soh?" Di aunty jus mek him know say she live deh. Same time di girl introduce har man to har aunty. Afta dat everybady nearly drap a grung inna shock wen di aunty bawl out to har niece say di bredren weh she jus introduce as har man was really har FATHER!!!! Pupa Jeeeezas!! Yes people, fada an dawta a dash out some shell dung sort out togeda fi three years an neva know dem related!!

Apparently it was a helleva trauma pon everybady involved. As it turn out the girl mada did briefly involve wid di fada an it look like a one sort out did rinse. Di mada an di fada neva really did inna a relationship. Afta di mada get pregnant she neva really mek nuh effort fi link di fada, an afta a while she have di baby an just raise har without di fada. Soh di dawta grow up not knowing har fada. An a soh she an har fada end up a meet 25 years layta and a deh fi three years.

Afta dem find out di real deal, di dawta an di fada decide say dem couldn't continue di relationship an den dem break up. However, afta about a year apart dem decide link up back an build a healthy fada an dawta relationship. Di idea was dat it neva mek sense him know him dawta an she know har fada an dem neva inna contact.

But afta dem link up back, before yuh know it di two a dem staat dagga again!! Yeah, is like dem bond as lovers was so strong dat as long as dem inna each other company sparks staat fly an di love tun up an dem haffi do di tings dem.

Pretty soon in a effort fi find a way fi continue dem relationship dem staat believe say a couldn't true har aunty and har mada did a talk. So dem decide fi go do a DNA test. Wen di test fahwud it prove say di man was in fact har fada. So there was no doubt, even though they were madly in love, she was di dawta an he was di fada.

At last check di man an di dawta still a link an a do di tings dem.

A whole heap a people a talk a bag a tings bout di mix-up. An me too have nuff weh me coulda chat pon it. But all me a goh say right now is ladies nuh care weh yuh an yuh baby fada have, always gi di pickney di fada last name, soh dat at least layta inna dem life dem can avoid a deh wid a man wid di same last name.

Fambily, weh unu tink bout di mix-up? Email mi an mek mi know: mixupraga@gmail.com.

Bless up unuself!

'Everybady nearly drap a grung inna shock wen di aunty bawl out to har niece say di bredren weh she jus introduce as har man was really har FATHER!!!!'