Bless up to all Tambareen Nation linky-linky an Mix Up Family. A jus di blessings. Heh Heeeeeyyyyyy!!! Todeh a mi earthstrong an mi really haffi give thanks dat mi live fi see anneda one. Anyways, see some mix-up ya.

A Bag a Prekeh

Raga, big up the gal weh wear har sista matey frock go big dance and the gal see har in deh and beat har. lol! Me say Raga, dem is a disgrace. The gal naav no ambition. U can a wear gal clothes, especially the gal weh u sista n har a tek d same man? No sah! smh!

But a d gal cousin outa order fi thief out the dress and gi the gal enemy! Matta a fact dem need fi stop breed up fi low life man weh nah do nutting fi dem! Me say Raga u memba di gal dem weh did get write up, the big stay bad bartenda gal weh me nuh like, and the big stinkin gal and the next one weh dagga fi the fish? From dem get the write up and people a laugh affa dem, dem start bill and stop hype pon people especially di bartenda. Me neva know say she wuda humble har self, seems as if a long time she shudda get write up. lol.

Oh and big up har dunce-bat babyfada weh nuh stop walk round and class har up wid har enemy dem. Raga, the bartenda gal need fi go get a life and know say me sister a con out har babyfada! All a har follower dem no inna har agen. Matter of fact dem neva wit har eida, cause har so called big fren weh she tell everyting and go pon road wid, go inna har fone and call har next man a foreign and tell him tings bout har. Me know that fi a fact.

Soh a how yuh jus a do dem bad soh? A wa dem do you? Cause yuh an dem mus have supm mek yuh a done dem soh. A fraid yuh fraid dem wi figure out seh a you a write me, an den goh pap yuh baxside??!!

Pon di real though, a gyal fi dash weh a bush if she really goh wear har sista matey frock. Both di mix-up police an di fashion police need fi lock up dat an dash weh di key. Hot gyal nuh hype inna dem sista matey frock. Dat pass luu an a get big boooo!! Kmt!!

Unda Mi Nose

Raga, mi a lissen to u show weh gwan Satday gaan an u talk bout fren weh a tek fren man. Raga, u memba di mix-up weh mi gi u bout mi neighba an ar Trini husband and di muma? Well Raga u nuh know seh di wife did mek ar bes fren come live wid har an every day she an di fren a tell di wife bout ow she fi lef har husband.

So afta di fren live wid dem fi a while di husban start complain ow im wah di fren leave cuz wen di wife gaan a work di fren a walk roun inna baggy pants weh every walk she walk or ben ova di pants a drop affa ar, an ow im nuh like dat she leave ar impy skimpy panty dem heng up inna di bathroom. So di wife tell me bout weh a gwaan an mi tell ar seh mi undastan seh is ar bess fren but summen nuh right an it would be best if she tell ar fi leave. So di wife now (she kinna sofy sofy) seh she go talk to di fren an give ar a time frame fi leave.

One month before di fren leave, di wife a tell me ow di fren start show har bad face an weneva di wife deh home di fren leave an nuh come in till di wife gaan a work. Me tell di wife seh dem type a behaviour deh nuh normal, especially since di husband uncomfortable wid ar inna di house. Raga, u nuh know seh di fren move out an nuh tell di wife nutten, she jus pack up an leave. Den all of a sudden di fren start come a di house come check di husband an a talk bout she come fi look fi dem daughter who suppose to be har goddaughter. Di fren nuh go a di house wen di wife deh home. So anyway, there's a club weh a group a we frequent, including di husband, but not di wife cuz she nuh go out. All of a sudden di fren start show up deh and she and di husband always thick, thick inna conversation wole nite, all dem pon dance floor a grine.

So di adda night all a we go out to di club and di fren an di husband a gwaan wid bare tings. Raga, me an my fren couldn't tek it nuh more, so wi step to di gyal. Mi seh she did a go get one piece a beaten, but mi fren man save har.

Cooyah!! Den yuh nuh see seh di husban did a sort out di wife fren?! An it look like a sykes him did a use di whole time wen him did a complain bout har.

Wen mi did deh pon radio a Jamaica mi did get a shell dung mix up like dis. A certain B a help out har fren an tek har een fi kotch wid she an har man. Two, twos di man a cuss out rahtid say him nuh like di woman. Eventually di woman did have fi ask har fren fi leave because har man nuh like har.

Afta dat di woman lef di man an bout a year later nearly drap dung wen she a goh through Cross Roads an see har ex-man an him new woman , di same fren him did claim say him hate!

A dat a di real unda-mi-nose bunning! Some people cold like freezer wen dem a do dem ting.

Bless up unu self. See unu Tuesday.