Brap! Brap! Brap!Singing like Half PintGreeeeetings, I bring, fram Raga!! Bless up unu self mi Mix Up Fambily an large up to mi Tambareen Nation. Bless up unu self. As usual mi a move straight to di mix up. Pree dis:

Bunna Man in Love

Good day, Raga. I have a friend who live a house wid ar good up, good-up man, but im sort-out lacking. She ave a bunna man pon di side weh a swipe and sort har out PRAPALY! And di bunna man ave fi im ooman too. Raga, as time goes by di bunna man an im ooman fall out and im seh im a go lef har. Him now start ketch feelings fi mi fren an start get more demanding. A guess him now wah dem fi stop di bunnin an deh straight out. My fren seh dat cyah work cuz she nah lef har man weh she live wid. My fren decide seh she a go tun mediator fi har bunna man an im ooman so dem can get back togeda. Raga, u know seh mi fren get di ooman numba, an call ar an pretend seh she a di girlfren fi one a di bunna man fren. She tell di ooman seh, ow di bunna man love ar, an she cyah jus mek him lef har so. She tell di ooman seh ow him a ave sleepless nights and dem go thru too much fi mek dem relationship go dung di drain.

Di ooman now start tell my fren some tings, bout ow di man controlling and watch har too much. But my fren did done know all dis, cuz di man discuss im ooman wid ar. But wah gwaan wid di bunna man an im ooman is dat di ooman start bun im wid a young bwoy and im fren dem know bout it cuz she nah hide. Him say if she did a bun him an nuhbadi nuh know it wouldnt so bad cuz a di distance between dem. Raga, mi seh mi fren all fren di ooman an a try convince har fi nuh done di relationship, cuz now di man a tek one piece a set pon har. But di man seh im nuh wah di oman nuh more cuz im tink him in love wid mi fren. Now she nuh know weh fi do. She say she affi go tek time tek weh ar self cuz im a go back pon di original deal.

Bless up u self, Raga.

Draaaaammeeeerrrrrrr!!! Yuh fren inna one hot piece a mess ya. She's quite right wen she say is har bunna man who a break di original deal. Clearly, dem did have an arrangement where she woulda keep har man, him keep him woman, an di two a dem do dem ting secretly. Soh now dat di man woman staat bun him too wid a youngas, him tun roun now a pressure him bunna girl fi leave fi har good-up good-up man.

Him wrong!! Him wrong, wrong wrong!!

Not because fi him ting mash up him now a goh waan yuh fren fi mash up fi har ting too. A mussi because him a lose fi him good-up good-up woman mek him a get desperate an a believe say him coulda lose him bunna girl too, an dats why him now waan fi permanently lock har een as him straight woman. But him haffi tink bout fi har situation too. If fi har ting wid har straight up man still a gwaan good, why she mus jus git up an lef har propa-propa man soh?

Di bunna man fi lowe yuh fren.

But yuh fren nuh easy too enuh. Dem phone sykes deh weh she rinse tun up. An yuh see how unu woman deep wid unu mix up psychology.

It dusty pon yuh fren. Cause now har bunna man can cause all kinda trouble because now him nuh have nuttin fi lose.

My recommendation is dat she haffi goh staat tek time gi him bare bad face, deliberately pap dung di sort out pon him, mek sure she do all a di tings dem weh him nuh like, an deliberately do some disgusting an nasty tings roun him fi sick him stomach an mek him get turn off an eventually leave by his own choice.

An in di future she mus always mek sure seh she NEVA GOH EENA ANYTING WIDOUT KNOWING EXACTLY HOW SHE CAN GET OUT. Always have an 'exit strategy', particularly wen it comes to bunning.

Bless up