Big respek to mi Tambareen Fambily an mi Mix Up massive. Bless up unu propa-propa self.

On to di Mix Up:

Dem still a Plot fi Mi

Wa day ya mi run a disturbing mix up bout a woman who figure out say har neighbour weh live below har a do di tings dem wid har son. A crasses woman who nuh like mi but mek sure she neva yet miss mi Star column write mi one long letta an a cuss mi say mi shouldn't did mek unu know bout di mix up. She basically did a say dat was a mix up weh mi shouldn't repeat. She gwaan bad inna di letta, she style mi up wicked, all tell me how dawg did a sort out (she use anoda word) mi mada - bare tings!! Me doan even bada ansa har, as mi usually do wen dem sen dem foolishniss to mi. An mi worst neva did a goh ansa she especially - cause me notice fram har email seh she a one a dem who obsessed wid mi fram long time. A smaddy she a look. Yes, a waan she waan mi. She a dead ova di Rags an nuh know how fi tell mi. But she mussi know betta dan fi step to mi dem way deh, cause mi nuh sleep wid weh hog refuse. An all di trap dem a set dem still cyaan ketch mi. Everytime dem set bait fi mi, mi jus sidestep dem an goh roun dem, cause man nuh licky-licky roun ere, an mi can see clear seh nuff a dem a bullfrog wid mani an pedi. An yuh can bet say dis gyal ya weh a write me is a likkle freak too. Yuh can bet say she a gwaan wid all manna of freaky tings weh she a hide, an dats why she mussi waan mi fi hide di tings dem weh happen out deh inna di worl'. An dat a if di so-called 'she' is even a woman, 'she' coulda be a man - cause a nuff a dem syches deh a rinse ya now - coward wretches a hide behind all kinds a FAKE emails and profiles.

But clearly 'she' cyaan ignore mi column. 'She' claim she nuh like me but 'she' unable fi ignore mi. If, as people like 'she' claim say a foolishniss mi a write, den weh dem a run goh buy di Star every Tuesday and Thursday fi read mi column fa??

Soh mi get it, an a soh mi gi it - people pinch me an tell me how certain people who nuh like mi, people who mi hear always a preach dung some serious violence an destruction pon mi, people who always a wish mi death - always a buy di Tuesday an Thursday Star fi read mi column.

Di ridiculous ting is dat yuh see dem same people deh weh a preach death pon mi, an always a swear some form a violence pon mi - mi neva see dem yet an mi neva do dem nuttin yet!! Mi coulda undastan if me an dem did inna war - but me an dem neva have nuttin yet. Dem just get up an staat hate mi. Dem jus' see mi a do well wid mi Mix Up brand an jus staat bad mind mi. It jus' bada dem an a kill dem dat me a enjoy mi self an a mek people a enjoy dem self, an a mek mi likkle money offa mi mix up entertainment. An it bada dem dat wen dem come try fi control mi, or try fi tell mi how mi fi live mi life because mi have a PhD, or come waan style mi up, mi jus done dem illiterate nastinisses!! LOL!

Brap! Brap! Brap! A how dem jus' a pressure dem self soh ova Raga??

People, hear dis: a whole heap a progressive people out deh a live dem good-good life without giving a damn weh Ragashanti a do or naa do. Yuh have people who nuh care bout mi mix up dem but jus' nuh pay mi nuh mind an keep dem selves busy wid important priorities inna dem respective lives. Dem people deh secure inna dem self an nuh mek my likkle mix up ting bada dem. Dem jus nuh listen Raga wen mi deh pon di radio wid mix up, an dem certainly don't specially buy di Star fi read di writings a smaddy weh dem doan like.

But di people dem weh obsessed wid every likkle ting Ragashanti say or do, di people dem weh get upset because mi happy, popular an a survive offa mi Mix Up vibe, di people dem weh always a plot how fi hurt mi or destroy mi jus because mi is a Mix Up entertainer, di people dem who create stupid justifications like dem fu-fool arguments dat mi comedic mix up vibe a destroy Jamaica, jus so dem can have a reason fi wish mi harm - di whole a unu is a set a bad mind, wicked an evil set a slime an wretches!! A dat mi say!! Wen johncrow use toilet a unu come out!!

So mout' say unu buy Tuesday an Thursday Star fi read weh mi a write while unu plot fi destroy mi. But unu efforts shall ultimately always be in vain.

One thing though ... unu smart enough fi know say unu couldn't come face mi directly wid unu intentions - cause if unu eva try dat ... den unu know di ting woulda dusty.

So unu gwaan tan inna unu satan darkness a plot fi destroy Ragashanti. But to each a unu who a scheme fi mi, jus' tek da one advice ya, as di saying goes inna wi sweet Jamaica - wen unu a dig hole fi mi, doan jus' dig one hole - dig two.

Blessings always ...