Sometimes the more tings change the more they remain the same. As a society and country we tend to be so guilty of being self-righteous hypocrites who talk di talk but no walk di walk!

Nuff a di problem dem and di sore dem wah we a face now have been caused and perpetrated by many of who a complain now. Mi no know if a me alone never did all dat surprise by the report wah di lady from CISOCA reveal weh day bout di kids dem and the sex dem involve inna at a tender age. Mi not even really upset at the children dem like how mi ignarant fi di so called parents dem who bring dem inna di world and the adults dem who shoulda be protecting dem likkle innocence.

Some people a act all surprised and alarmed like dem no know seh di tings dem a gwaan long time and nuff a dem enable and open up di pickney dem sexual appetite and awareness because a di tings dem wah dem carry on wid round di pickney dem. Dem watch di big dutty blue movie dem in earshot of di children; dem no put no parental lock pon the tv so dem kids no have access to certain channel; dem change man in front a dem pickney like how dem change dem panty and dem bring in all kinda woman pon dem pickney like is a brothel dem a run!

sexual stimulus

When dem see and hear all these tings wat are they to conjure up inna dem likkle mind weh done naturally programme sexually as a human being already?! Dem lef dem children all unsupervised chu dem waa go have dem wanton sex and if the child is constantly around sexual stimulus dem mus adapt it! Mi go some play an some show weh pure big people tings a talk, sexual undertone and overtone tun up loud and di likkle pickney dem inna di thick a tings!

Some people as likkle rain fall dem waa wet up inna it and so dem expose dem kids to adult information from early an when dem start act it out dem a wonda why! Don't wonda, a yuh cause it! If u cyaa find a babysitta nobodda go di play, di movie nor di dance ketch it next time!

Nobodda mention di dance dem an di action an spread out wah gwaan inna dat deh space sometime when mi see di gal an bwoy dem tear weh pon dem one a nedda mi haffi wonda dear God a smaddy modda an fadda dat? Wat di worl a come to?

encourage dem

Little boys are encouraged from before dem can even balance fi walk good fi "wine up pon dah gal deh" ... Some even laugh an encourage di baby dem fi touch dem private parts cause dem a buss dem from early and dem want di likkle bwoy tun a galis so when him reach six an so highly sexually charged because a all weh him a absorb over di years an touch him likkle sister or cousin or neighbour a who dem waa blame?

Little baby girls are encouraged to master the art of wining before dem can even spell it and dressed up inna belly skin an mini before dem start basic school ... So, when she start behave like her mother or those around her a who fi blame? We need fi shake up we folly ground especially because nuff a who a talk used to play dolly house back inna di day an who a neva mama a did papa! A long time "nastiness" and "duggu duggu" a gwaan and we need to curb it. Pickney fi be pickney and though sometimes no matter how vigilant you are as a parent yuh cyaa see and monitor everything but yuh haffi have yuh finger on the pulse at all times. Don't expect fi plant corn an reap peas and live a dutty life in front a yuh pickney dem an tink some a di duttiness naah go rub off pon dem! If the adults cyaa clean up fi dem life a how di baby dem ago manage? Mi glad the information a come out now because as a nation we've kept sex and sexuality a secret and a live in denial.Many grown men and woman have a story to tell but chu certain tings cyaa talk or was not allowed to talk and it affect dem up til today.We haffi clean up ... the children are depending on it!

'Some even laugh an encourage di baby dem fi touch dem private parts cause dem a buss dem from early and dem want di likkle bwoy tun a galis ... '