Bless up to all a mi Tambareen Fambily an all Mix Up linky-linky. Bless up unu tun-up tun-up self. An big up to all a unu nastinisses who nuh like mi or da column ya, but always mek sure unu buy di Star EVERY Tuesday and Thursday jus fi read weh mi write. Claim say unu broite, but a mek some humourous mix up a beat unu bad. If unu nuh like weh mi write, weh unu a kill off unu self fi read mi mix up dem fa?? A mus Donkey push out some a unu. KMT!!

Some a unu get miserable bout di last Mix Up wid di mada an di son weh a sleep togeda. Mi not even a bada goh eena di details a unu stupidity, but jus hear dis, YES!! there are mothers who are sleeping with their sons!! Indications are that they are nowhere near as much as the fathers who are sleeping with their daughters, BUT IT A HAPPEN!! An nuttin nuh wrong if we rinse di Mix Up dem bout dem tings ya. Because some a unu uncomfortable bout certain tings an because unu also inna denial bout dem, unu feel say dem fi sweep unda di rug an we fi hide dem an nuh chat bout dem. But a nuh so di ting work wid mi. A me say mix up fi rinse!! So me naa look pon some ignorant, dunce-bat duppy.

So hear wa ... all a unu who nuh like mi ... TEK A NUMBA an JOIN DI LINE!!

Anyways, mi naa spend too much a mi valuable time pon some a unu waste people. A Mix Up time now. Pree dis!

Workplace Mix Up

Raga, one a we Team Leader a me work place have him woman working there as well, she a de wife. So yesterday de wife and har man deh a work. De Team Leader a gi de wife bun wit five different woman, an all a dem work a de same place too, plus dem new. De Main Matey go in a de office weh de wife station an stand up at the doorway wit all of the wife co-workers dem deh deh and say "Me nuh kno weh you andde Team Leader namehave enuh but just to let you know, we are intimate," and she walk weh. Now Raga, wifey neva say or do anything about it afta she hear dat.

Anyway, apparently Main Matey start a deny seh she and the Team Leader nuh deh. So while dem deh pon lunch, him come an shat har a bax cross har face in front a her fren dem an tell har seh she fe stop tell ppl seh dem no deh togetha. She cudn't do crap bout dat neither. Anyway lata down, Main Matey go mek up a fake email address and send wifey a email and copy all of her coworker dem name to it. De email was about she a sort out wifey man and she tell har in de mail say the day when she a ring off him phone 20 times and him nah ansa was becuz she and him was at the movies. She bare face bad enuh Raga! All a tell de wife seh him a look har fren dem too, but is like de way how she do de mail, she a mek it look like ano she write it.

Me nah lie Raga, workplace mash up! Everybody get a read off a de mail and everybody a lauf affa wifey, and she still no do nutten bout de mail weh har matey sen or when she did come to har. So wifey a try call har man phone and him nah ansa so she use smaddy else phone and call him, and hear har nuh "Babes you know you too nice to these ppl, babes." She all a ask him wah did happen wit him fone when she a try call him the otha day. Hear dis now Raga, de man tell har seh him did a play music pon him phone and it did ina him pocket!!! Raga one woman can so fool fe believe dat! Him all a tell har seh she nuffi believe wah dem a say to her becuz a lie dem a tell, and she believe him bout it. Today now de Team Leader no bada come a work enuh, him call in sick. Me nuh know if wifey show up but Main Matey deh deh now wid har head held high like a she a de wife.

Da man ya a real dawg Raga, cuz me all a hear seh wen me workplace did sen him go someweh else go work fe four days and him go sex off one a de manager dem and a next albino looking girl too! Bwoy Raga him nuh normal at all, him tek ova from de Worl' Boss! Oh an anoda ting Raga, him married to a white woman!

Da bredda deh a shell dung unu workplace. Him nuh fraid one a dem woman deh get bringle an do him supm cold? My rule is if yuh have a good woman yuh nuh fi cheat. But if yuh feel say yuh haffi cheat den yuh mus bun wid respek an bun safely. Right ya now him naa bun safely. Is a big no-no fi a keep a bag a lovers a yuh workplace. That's just asking fi all kind a drama fi reach yuh. Rememba, most people spend most a dem waking hours inna dem workplace. So a jus straight drama dat yuh a bring dung pon yuh self at di place weh yuh a eat yuh likkle survival food. Arrogance a get di betta a him. Him betta buil an chill before ole house tumble dung pon him.

An in di meantime, people, DOAN BUN INNA DI PLACE WHERE YUH WORK, an DOAN BUN INNA DI COMPLEX OR AREA WEH UNU LIVE, an DOAN BUN INNA DI SCHOOL WEH UNU GOH!!