Dem seh cow neva know di use a him tail til' fly bite him and mi ago use it in another way fi seh people no know the value an di beauty a dem country til' yuh go sumweh else and fi dem place no tan good like yours!

Mi naa lie, if anybody refer to Jamaica as a third worl' country a mus di band dem a talk bout or money dem waa beg cause nutten no third bout we infrastructure or we wonderful island. Mi naa tell no lie mi wish the embassy dem woulda free up di visa dem some more so more people coulda go out deh go see seh is not a bed a rose a some place weh dem a kill up demself fi go and realise the value in dem owna country and appreciate it.

badmind

Things wah we tek fi granted the weather, the food, accessibility to technology and even though some a dem dutty and badmind, Jamaican people a one in the worl'! When God a mek we him no classify we as black or white him put we inna one category by weself ... maybe when we ago go a Hell or Heaven, a different gate we haffi walk thru!

It is disheartening though that there is a broad brush used by some countries or islands to judge every Jamaican. Mek mi jus' seh fass fass, all Jamaican anno angel, we have our fair share of demons like everywhere else! Every weh have dem sore foot and every weh have dem deviants. Mi sure seh jail an prison deh every weh an anno puss and dawg inna dem a fi dem same citizen in deh which says badness and criminality is not unique to Jamaica.

Sometime when Jamaicans a travel the disdain and contempt weh dem treat we wid mek mi blood boil! Because all some place weh yuh can drive out inna 45 minutes or walk out in a day, a hype an a put visa restriction pon Jamaicans.

Mi no mine if dem ago have dem rules because there are rules every weh but if we ago need visa fi go deh dem need visa fi come yah! VISA fi VISA! Afta dem no more dan we! Maybe that could also be a source of revenue - visa application.

stress

Some a di place dem weh a gwaan hoity tighty not even big like St Catherine, no have no highway and nuff board and mud house dem have deh! Mi naa bring dung nobody country because everywhere has something special but it unfair fi we a get stress a road an any an anybody can jus' come a our paradise without any or much hastle. It no level an it no right.

Nuff time people from dem different nation come yah an gwaan wid a crocus bag a dutty tings and lef and go brag a dem yaad bout wah dem do dung yah. It can't be that dem can come yah pon licence or jus' chu dem have curly or straight hair and different colour eye! We have our interest to protect as well.

It not even bun mi as much when big farin a require visa but some likkle island weh a go hard it grieve me! Jamaicans need fi start tek pride in being Jamaican an when we go a di people dem place conduct ourselves lawfully because it makes it so hard on others who have no criminal intention and go some people, whoffa island cyaa walk inna Jamaica shadow, di right fi hype!

If Jamaica did belong to some a dem dem woulda barracade in demself like dung a Tivoli cause dem wouldn't want nobody yah. Reciprocation is the name of the game. Treat our people well an the same will be meted out to u. Some people have no desire to leave or run off ... dem jus waa go look and come back! Sweet sweet Jamaica we naa lef yah ... not illegally anyway!!!

Mek mi jus' seh fass fass, all Jamaican anno angel, we have our fair share of demons like everywhere else! Every weh have dem sore foot and every weh have dem deviants.