Brap! Brap! Brap!! Wa a gwaan peeps?? Unu big up unu good-good mix up self. An shell dung respek to mi Tambareen Fambily linky-linky.

A mix up mi say ya now:

Pap Dung Artist

People, as mi say before, a inna Obama Land mi live ya now, and, of course, up ya nuh short a mix up. Cause where few or many are gathered, mix up smothered. lol.

So wa day ya me a chat wid dis Jamaican girl up ya. She tell me say she always love listen mi Mix Up radio programme dem, an how she always mek sure she ketch mi pon di Internet.

She say one day she get a call fram Jamaica an wen she ansa she notice say a di wrong numba di man call. She say di man neva kya seh a di wrong numba an still did waan talk to har. She say she jus gwaan reason wid him likkle bit. Him tell har say him a toppa-top artist a Jamaica. Not artist as in dancehall artiste, but di artist weh do paintings pon canvas. Pretty soon di bredda keep on a call har an slowly but surely staat sneak up pon har wid lookings argument.Afta a while him all staat sen on some good money gi har. She say she tek di money dem an did jus gwaan reason wid him as usual.

One day wen him call har she did a listen mi show. Him hear di sound inna di background an ask har wa she a listen. She tell him say she a listen to Ragashanti. People ... di man get bringle!! Him get cross!! Him staat done mi wid a bag a tings! Him give it to har wicked bout how she coulda a listen a eediat like me, an how him did expect betta fram har. Him staat class mi up wid di supm dem, all tell har how me a 'educated dunce.' Lol! Him done mi wicked, wicked. Him really do me bad.

When she reel out di tings dem me staat laugh an a explain to har say a soh some a di so-called bright people dem a Jamaica love done me. Mi mek she know a regular ting dat fram dem.

But hear di sweet part now. Di bredda reach a point where she staat play him like fiddle. In total him end up a send thousands of US dollars to har. It reach a point weh him sen money specifically fi buy plane ticket fi she goh Jamaica to him - while all dis time she was actually travelling to Jamaica on several occasions widout him knowing. She neva buy nuh plane ticket fi see him. She jus rinse out him money inna crazy flossing.

Eventually, him staat pressure har fi gi him date wen she a goh Jamaica. A right deh so she stop tek him calls dem. Di man get bex, bex, bex! Him staat class har up di most way! An see di sweet part ya now: di man reach a point weh him get draw out an staat cuss di girl bout how much him a goh OBEAH har!! Puppa Jeezas! Him staat reel out him obeah links dem an wa an wa him a goh mek di obeah do to di girl!

Fambily, unu see how life funny, dis ya man ya weh claim seh him brilliant an intelligent, meet farin gyal pon phone weh him claim seh him accidentally call, tek up him thousands a US dollars sen goh gi gyal weh him neva see fram him bawn, sen hundreds more US dollars fi shi fly inna style goh to him inna Jamaica, den wen she nuh fahwud him staat gwaan di most way how him a goh obeah har - an have di heart fi a say a ME RAGASHANTI a eediat??!!

Dutty artist painter bwoy!!! A you a di eediat!! Yuh fool nuh faleetee!! If yuh mumma hear dis shi mus shame a yuh! Shi woulda neva believe seh is such a eediat shi did push out!! Yuh nuh see say yuh a kunumunu??!! Yuh birth was a mistake! Yuh life mus miserable bad dat yuh all believe yuh deh wid woman yuh neva see yet. Ole eediat. If yuh did a pree mix up lakka mi yuh wouldn't so fu-fool. Bout yuh gaan tek up thousands a US dollars sen goh gi gyal weh yuh neva meet yet, an all a sen more fi shi buy plane ticket. An den have di heart fi a talk bout yuh a goh obeah har. Nuh unu boasy people always a say obeah a superstition? Soh if yuh so bright how come yuh so involve inna tings like obeah??!! Inna Big Wayne voice A wa do da man ya man??!!

Some a unu so-called bright, boasy people love mek Ragashanti an him antics dem bada unu eeh?? Before unu goh live unu life unu a worry bout me. But a gwine pressure unu nastinisses!! Unu a goh tyad fi see mi face!! Unu tink mi did done ... mi jus a come!!

A wa do some people??!! KMT!!