Shell dung respek to all a mi Tambareen Fambily an mi Mix Up massive. An propa big up to all listeners pon Tambareen Radio ova Mix Up Yaad (mixupyaad.com).

On to di mix up:

Nasty Boasy People

Raga, me live a New York and just get a job fi take care a dis married couple's three children them. Me have to pick up di children dem in di afternoon and take care a them until them parents them come home around 7:30 to 8 p.m.

Raga, me start get bad vibes when the mother did a show me roun them place and a explain things to me and go tell me say the whole family only bathe every other day. Raga the mother and the father a big, big doctor weh only work with rich people in a big-shot area.

Then when time come fi mi bathe dem likkle six-year-old daughter we in a the bathroom and me ask har where is har bathing rag. She ask me what is that? So me tell har is the thing that her mother use to put soap on her. Raga me nearly dead when the little girl point pon a sponge and say "we all use that". Me ask har if she sure. She say yes, all five a them use the sponge fi bathe every other day. Raga, yuh can believe say people nasty so?

But it nuh done deh so, Raga. Wa day she give me laundry fi do, which wasn't part of what me was hired to do. Anyway, me did just think a di pickney them clothes and did a go wash them. When me throw out the dirty clothes them me notice say the parents them clothes did in deh too. And me get vex when me see plenty a the woman panty them in deh. Raga the woman waan me fi wash all a dutty panty them

Raga, me just call har and make she know that when she hired me, washing clothes was not part of the agreement. And me also make har know that I'm not comfortable washing her underwear. Raga the woman a go make me know say she sees nothing wrong with that because it is a part of my work, and that she and I will talk about it when she gets home. Raga yuh nuh know how mi vex.

Now me nuh know what fi do. Because me need the job, but me nuh know if me fi work with them nasty people ya weh the whole family use the same sponge. And me definitely naa wash nuh woman panty. Me need the money but me nuh desperate.

What a piece a prekeh! Dem nasty fi real. However, it look like yuh already answer yuh question. It sounds to me that you just cannot get to di point where you would wash her panties. But you should know this, the same problems exist in Jamaica with a lot of helpers. The uptown women hire them to wash their clothes and these uptown women just see their underwear as just another piece of clothes just like any other. In other words, they believe that their panties should receive the same treatment as their blouses, dresses, jeans, etc. But working class and ghetto Jamaican women treat their panties different. From very early, females are trained to take full responsibility for the cleanliness of their own underwear. Most Jamaican ghetto women and working class women would find it disgusting if another woman would wash their underwear, much less a woman that is not their mother or sister, etc.

Den dis ting ya now wid di sponge - a di heights a nastiniss dat too! Yuh jus cyaan have mada, fada an dem three pickney a bade wid di same sponge every oda day!! Dem nastiniss a buck! An while me know people a goh say mi a pick pon di woman, mi nuh bizniz - cause as woman she shoulda know betta. If she a woman weh a get har monthlies an all dem tings deh, she nuh have no bizniz a expose di res a har family to har crasses. Ole nastiniss!!

An di ting is there is nuttin weh hol germs an crasses more dan sponge. Dat deh sponge mussi a hol years a nastiniss fram di whole family. It mus have een hundreds a likkle tiny insects an creatures.

Probably yuh can jus tell har yuh will continue di job if she stick to di original agreement and nuh mek yuh wash nuttin. Or jus tell har say you will wash but you just can't wash har underwear. Then tell har say you're suggesting that they have separate sponges or rags fi dem bade. Probably yuh can politely mek dem suggestion deh an see weh she say. Because, in truth, if you nuh dweet, somebody else will. But if yuh jus cyaan wash anneda woman panty den a jus soh di ting set.

All di best.