Mi naa lie to how Magum Kings and Queens of Dancehall tun up Saturday gone all now cold bump a full mi body!

Even though Professa Nuts did a try buss some, more still lef to how the contestant dem tun up di ting! Mi so glad and humbled fi be part of a show weh bring young people to the fore to showcase dem talent and give them hope and options which would have otherwise been unavailable to most a dem.

As young people sometimes we are misunderstood and underestimated and because a dat it help stunt nuff a di growth of some very talented young men and women. If only dem did get di help and some guidance wid whole heap a love dash out pon it Jamaica woulda have a space shuttle a lef yah!

We full a talent bad bad bad but because there is no proper channel more while fi get it out, nuff a it get wasted. When mi drive thru nuff garrison and see the art work pon di wall dem, when mi see how dem tun dem hand an mek fashion, when I see that many of the celebrities and game changers inna we society come from poor humble beginnings, mi know seh nuff yute down deh just want a start...a helping hand.

love pickney

And das y mi ignorant when di man dem go roun and breed up di place bout dem a multiply an have out dem lot! Nuff man wah claim dem love pickney a wicked...most a dem a wah me call reproductive abusers (RA)! Dem have di pickney dem fi hype up dem nasty self and dont know how di pickney eat, sleep or drink! How can a man have 10 or more pickney in a different different place and be a good father? One outta di 10 or more a go get lef or no get weh dem supposed to get!

Mi ask one RA him fi name out di 17 pickney weh him seh him have and tell mi dem birthday and dem modda full name...mi still a wait from last year til now! Scandalous! It no look good and it no sound good! A different ting if all 10 or more inna one dwelling and everybody eat and drink together as a famliy but dah slavery mentally deh weh the family broken to pieces a help contribute to the stunted growth of our children.We a ramp wid we future because that weh we sow a dat we ago reap!

breed outta spite

Di woman also haffi tek responsibility fi dem vagina because at the end a di day when yuh no sure bout di fadda yuh always sure a who a di modda! Too much woman a breed outta spite and fi hol' man an all kinda rubbish and at di end a di day ring naa hol' dem, money naah hol' dem (well sum a dem licky licky and love likes so yuh may can ketch dem fi while), 'if yuh can 6:30 dat naa hol dem and baby definitely naah hol' dem.

Mi do understand seh sometimes a circumstance cause nuff a di unwanted belly because in the quest fi seek betta fi u an u kids dem, sometime sperm stop yuh like Saul pon Damascus road and yuh get ketch but at the same time women all are we and we haffi tek a stand and know when a lock leg time.

Stick 10 dozen pin deh it look like dis is di year to make a mockery of flags and infuriate people by just wanton carelessness and lack of thought. Now di one wid di green lef out was quite offensive but being a little dragged out and belaboured and den di one a Bob Marley documentary premier was just really sad too.

Now people need fi understand seh the flag represents a people ... who they are and what they have had to go through to even have a flag. People dead fi nuff flag weh a fly, go a prison fi nuff flag weh a fly and sacrifice themself fi dem flag. Why at a Rastafarian function yuh a go put colours simulating the flag on the ground for people to walk on? Dat is a cardinal sin an all Stevie an Wayne Wonder haffi a wonda wah dem did a tink!

All me would call dung Selassie pon dem! People heritage a no sumting fi ramp wid, yuh fi ramp inna yuh bed and if a decorator isn't sure just ask around and get some feedback but sum tings nobody shouldn't haffi tell yuh bout dah sumting deh...protocol fi jus' be observed! Check all colurs an mek sure none no run out and please understand that a flag on the ground means insult! Jah Rastafari! A mi fi tell unnu! Lalalalalalalala