Bless up to all mix up linky-linky an all a me Tambareen Fambily. An di usual propa respek to al listeners pon Tambareen Radio ova mixupyaad.com.

Eediat Man Tief

Raga mi ave ah mixup fi rinse out. Couple weeks a guh mi an ah gal in mi scheme ketch a fight ova mi man of five years. Raga it start like dis. Me guh wey fi a few days fi visit me madda weh live in a different parish caa shi neva did well. Anyways, wen me come back ah pey pree dis caan-walk-pass-cemetery gal ah pree mi. Soh mi did ah wonda ah wah a gwaan but mi nuh seh nuttin to de gal mi jus avoid har.

Den one day mi a come from wuk wen di gal an har fren dem start drop dem wud bout dem tek any gal man an start all sing lady saw song "I got ur man & u caan du anyting about it". Only fi find out di nex day fram a gal weh live inna di community seh wen mi de guh wey fi de few days one dance did keep & dis Lada-body gal an mi man did dance togeda an fram den shi ah walk an ah tell people seh mi man seh ah de bes wine dat im eva get an how him ah guh waant har.

Days pass mi ah cum frum wuk again an di gal an har fren dem still ah drop dem wud soh mi sey to har seh if ah mi shi ah bright arself wid? Den di gal fly inna mi face an sey "soh wat?". Raga ah piece a rage ova tek mi an ah jus bax ar dung! By dis time ar fren dem waan cum in deh, but it look like sumbody guh tell mi man wa ah gwaan an im cum on same time wen mi ave one ah ar fren dem in ah chokehold an im part wi an mi tell im waah gwaan. Him tell di gal fren dem seh ah nuh fi dem fight an di gal still waan fight mi afta mi bax ar dung an a chat bout it nah goh soh. Mi move to ar same time an start give it to har caah it seem shi love di lick dem an mi man back off har fren dem an tell dem seh dem nuh fi cum in a it, har else. Raga mi nah lie it did feel gud fi put on di lick dem pon ar. Afta dat mi an mi man guh home guh ave di bes sort out wi eva ave! Raga mi jus waant yuh fi big up di gal an mi waan tell ar thanks an ask ar if shi neva know seh ghetto gal dem know how fi defen wats theirs?! Ah which gal weh grow up inna scheme mi ah guh mek beat mi up much less fi wine betta dan mi?! Ah mi put de G inna GOOD body; shi an ar fren dem a luu. Why pree?!

Heh heh heeeeeeyyyyyyy!!! Hot ya now!! A which scheme gyal a tek a nex gyal man an cyaan defen it??!! Some gyal fi know seh if dem a goh broite enuff fi tek a hot gyal man, den dem haffi hotta dan di gyal an badda dan di gyal! Yeah!! Weh yuh say, is a "Lada-body" gyal a ''try tek yuh man?? If a laugh a pass wind!! Shi not even have a Deportee body an a come prims up har self pon yuh Range body.

No, but seriously, if she a goh tek yuh man neatly weh she a walk an a trouble yuh fa? An look deh, is a one dance she get fram yuh man an a goh staat wid dem breed a hype deh. Ole eediat! She come een like dem fool deh weh buy lotto an cash pot an staat hype bout weh dem a goh do wid di winnings before di draw.

She a ring eedy boo eeh. If she waan screechie an tek yuh man den she nuh jus gwaan do har ting neatly. Why she feel she haffi loud up di ting and waan done yuh inna public?

Mi nuh sarry fi har. It nuh mek sense fi be a man-tief an a loud mout an yuh cyaan fight. She a fren-bad-gyal, dem catty deh weh ongle bad wen dem a roll wid dem fren.

So unu hear di hundred, ladies, if yuh know say yuh is NOT a bad gyal weh can defen yuh self, DEN LEAVE PEOPLE MAN ALONE!!! An if yuh a tek a gyal man an yuh cyaan defen it DEN DONT WALK AN TROUBLE DI MAN WOMAN!! An lastly, if yuh know seh di ongle time yuh have bad gyal strength a wen yuh deh mongst yuh fren dem, LEAVE PEOPLE MAN ALONE!! Fi real, a wa do some gyal who did skol di man tief class. Fi real, why pree??!! Why pree?? Some gyal fi jus buil, an goh back goh calm dem self inna Sunday School, Youth Fellowship an Vocational Bible School, an leave di man-tief ting to di real in-di-street Goodas Gyal dem an di Daggerring Tege-reg weh know how fi trick di crowd wid dem cyaan-mash-ants innocent faces. Some gyal a run een an neva study di ting, an en up a luddy di ting!! Cho! KMT!! LOL!! Yuh know wa ... mi gaan yaa. See unu Thursday.

Ragashanti The King of Mix Up