Bless up all TamBless up all Tambareen Fambily linky-linky an all Mix Up Yaad (mixup yaad.com) massive. An non-stop big-up to all listeners pon Tambareen Radio same place ova Mix Up Yaad. Big up unu tan-soh tan-soh mix up self! LOL!

Awright, mix up time:

Fool, Fool Wifey

Raga, I recently got into my boyfriend's email and found out he's been seeing this other girl. I found out who she is and cannot believe he would get involved with someone like that. She's one of those loud types from downtown. She works in a hairdressing parlour down there. I want to go down there and let her know he has a woman. I'm thinking of taking a taxi and have the taxi man just come in with me while I tell her and then just leave with the taxi man when I'm done. She needs to know that he's my man and he's with me because from what they have been writing it looks like he did not tell her.

Laawwd have mercy. No, no, Laaawd, doan HAVE di mercy, GIVE di mercy. Because yuh have a gyal dung yah weh obviously need it. God, sometimes mi haffi really wonda if a yuh mek everybody fi true, cause di way how some a dem people ya fool-fool dem a mek yuh look bad.

Now to you now likkle gyal, YUH A EEDIAT??!! Weh yuh a do wid man if yuh nuh have sense??!! Puppa Jeezas!! Mi wish me did know yuh age cause den mi woulda undastan yuh betta. First, yuh problem is not dat di hairdressa woman need fi know seh yu have a man. A yuh MAN need fi know seh him already have a woman! A yuh man yuh fi chat to, not di hairdressa. Afta di hairdressa neva diss yuh. So weh yuh waan chat to har fa??!! Chat to yuh man fus an find out weh him deh pon. So tell mi, if yuh man have whole heap a woman, or if him a goh always tek woman pon yuh, yuh a go spen yuh res a yuh life a walk roun a tell all a di woman dem bout yuh self? My girl di hairdressa a nuh yuh problem, yuh needs to moves to yuh man!

Nex, a weh yuh did really mean wen yuh write "she's one of those loud types from downtown"? Yuh know wa, mi naa goh tek yuh aan ya soh enuh, cause yuh really neva did diss di programme, even doe it look like yuh deh right a di edge. But mind how yuh a talk bout mi downtown ladies dem, cause a my ladies dem deh, an mi doan waan any a unu gwaan like unu waan diss dem. Big up mi ghetto goodaz dem, to di max. An big up mi uptown ladies who a walla inna di stay-right too. Propa!

Nex, (inna boasy people voice) I would like to inform you that taxi operators provide a particular transportation service to the public, and, to the best of my knowledge, are not known to also provide bodyguard services, nor are they known to be effective mediators in a violent fracas - cause yuh a mus kunu munu if yuh tink di taxi man can stop di hairdressa gyal fram pap up yuh warra-warra! Yuh naa tink, cause if yuh did a tink yuh woulda realise seh it is not a good idea fi lef weh yuh deh fi go downtown go argue wid gyal ova man, an dat it wossa not a good idea fi go argue wid a downtown HAIRDRESSA!! Yuh mad!! Dem deh gyal deh wi chamba-chamba up yuh nastiness! Dem gyal deh can defen dem ting. Dem gyal deh nuh stop sing di song "If me a tek a gyal man, mi can defen dat!". Di hairdressa an har crew woulda probably mash up both you AN di taxi man. Listen to mi, yuh a luddy, a betta yuh tan tuddy an stay home wid yuh b ..... ahem!! ... boyfriend. Nuh goh nuh weh, cause supm tell me say if yuh goh dung deh dat hairdressa gyal woulda tear yuh up like like wen pickney a tear up a bad homework. Tan a yuh yaad an deal wid di matta wid yuh man, bout yuh waan goh downtown goh argue wid hairdressa.

An big-up all mi hairdressa linky-linky out deh. Lee Chin Ladies dung a Mark Lane big up unu self. Cheryl pon East Queen Street large up too. An all who a do hair a street side roun a Back Market, Princess Street an all a dem ends deh. Big up all hairdressa!! A dat mi say! Straight!

Bless up unu self people, mi gaan look likkle food ya now, cause a piece a peckish deh ya a mash mi up yuh see. Sen een unu mix up dem same way. Write me at mixupraga@gmail.com, or link me pon di Tambareen Radio BB pin at 224A4A85. Bless up unu self, and mi wi see unu same place ya soh inna di STAR Thursday.