Big respek to all Mix Up massive an mi propa-propa Tambareen Fambily. An big up to all listeners pon Tambareen Radio ova Mix Up Yaad (mixupyaad.com). A straight blessings mi say.

Mix up time:

Glue inna di Sort Out

Raga yuh ever use glue before yu sort out. It mad. Yu fi try it. Jus sniff di glue deep, deep an it gi yuh a vibe. And make yuh sort out tun up.

Missa Man, mi love mix up, cause dem mek yuh laugh an teach yuh a lot bout humanity. But hear dis, mi a bwoy nuh inna di bag a foolishniss. Weh di headside yuh a do a sniff glue before yuh sort out??!! Yuh a mad man??!! My yute, yuh have any idea how much problems dem a have inna oda countries wid people who a sniff glue?? Is a dangerous ting! Unu fi stop sniff glue fi get high. Leggo dem ting deh. It nuh matta how much yuh tink it mek yuh sort out tun up. Massa, if yuh eva know how much toxins inna glue yuh wouldn't a abuse yuh nose dem way deh. Yuh cyaan find nuttin betta fi sniff? An yuh need fi know seh every sniff yuh sniff di glue yuh a sen all dem toxins deh inna yuh bloodstream. Before yuh know it di glue sniffing might soon mek yuh cyaan even get an erection.

An mi nuh know why yuh come a recommend dis to mi. Yuh nuh see how mi nose big? Den wen mi goh use my big nose goh sniff dat deh glue deh yuh can imagine how much crasses mi nose woulda draw inna mi bady. Noooo sah!! Dem tings deh a nuh fi mi. A ongle one type a glue mi like wen mi a sort out, an some woman have dat nuff aready. Mi nuh need nuh more glue.

Toilet Paypa an Toothpaste Tief

Raga me an a co-worker did inna a relationship. We work fi di same company but at different branches. Raga wen him come ova mi house him always a tief out mi toothpaste and toilet paper. It look like wen him a take the toothpaste him squeeze it out in some small plastic bag that him always walk with. And when him a take di toilet paper him just roll off plenty and hide it. But me did start notice say anytime him come ova and leave, me toilet paper and toothpaste them always gone down.

Me ask him bout it Raga, and him a get upset and a say him cyaan believe a really toothpaste and toilet paper me a gwaan so ova. Raga a more than one time him do it. And even though him is a nice man him behaviour still no right.

Lef him!! Lef him right now!! A weh yuh goh pick up dat deh cayliss dawg fa? Yuh know dem dawg deh weh walk a night time a look food an bone inna people yaad, an a raid people garbage. Doan mek him trick yuh! A syches di wretch a try syches yuh wen him a try mek it look like yuh a luu because yuh upset wid weh him a do. Normal man nuh constantly tief toothpaste an toilet paypa fram him woman. Him sick! Mek him move him nastiness an guweh! Not even if a man bruk an nuh have nuh money him fi do dem tings deh. A betta a man tek a money offa him woman an go buy dem tings deh, dan fi a tief dem fram har.

Dutty toilet paypa tiefing bwoy!! Yuh shame man!! How yuh fi a tief toothpaste an toilet paypa fram yuh woman? A wa mek yuh like yuh girl toilet paypa soh? Wa, a di tuff toilet paypa dem you have, while yuh girl have di Charmin Ultra Soft? Hear mi man, rada dan a tief yuh girl toilet paypa a betta yuh did goh wet newspaper an do yuh ting. A almshouse dat bossy. Yuh fi leggo dem tings deh. Nuh dweet again. An nuh bada bex if yuh woman lef yuh, cause no sensible, ambitious woman must stay wid har man if him always a tief har toothpaste an toilet paypa. Yuh a luu.