Tambareen Fambily an all Mix Up linky-linky bless up unu self. An propa respek to all listeners pon Tambareen Radio ova Mix Up Yaad (mixupyaad.com).

Mi have several likkle mix ups weh mi did a save up, soh mi a rinse dem todeh.

Curry Bully Beef?

Miss Lady weh cook curry bully beef gi di man, yuh righted?? Mi neva hear dat yet. Yuh mumma woulda shame a yuh.

Nasty Naa Bade Man

A bredda a get a sort out roun a di back a di house a di people dem wedding reception. Wen clothes a fly off di woman ask him "how yuh smell soh?" Di man replied: "Me did figet fi bade before mi come a di wedding." Di woman just promptly put on back har clothes. Now him a walk a tell people say she wicked cause she get har kicks fram teasing man right to di edge. DUTTY MAN!!! Stop walk an slanda di woman!! Weh yuh nuh goh bade yuh nasty kin!! An yuh not only nasty, but yuh nuh have nuh ambition needa. Who di hell talk bout dem figet fi bade before dem goh a one wedding?? Mi neva hear dat yet. And not only is dat crazy, but yuh fool-fool enuff fi goh actually tell dat to a woman who already tek off har clothes fi gi yuh likkle a har good-good. Damn fool! Hear wa a goh gwaan ya now yuh see di woman ting, lowe it. A nuh your ting dat. Den goh find a pigsty, cause a in deh soh yuh a goh find your type a females. Dem naa goh even ask yuh bout yuh stinking self. Dem like it dutty. Yeah, go eat some pork!

JUTC Driver Mix Up

Missa JUTC Driver. A dem tings deh yuh a gwaan wid inna di govament bus. Yuh an yuh combolo dem jus a nasty up di public seat dem soh. A Garnett Roper a di new chairman a unu board now. Yuh gwine feneh if him find out.

Weh di statement really mean?

Mi haffi careful how mi write da one ya. Soh unu haffi read carefully between di lines. Tree days a goh (yeah "Tree", yuh nuh see say a patwa mi a write inna?), a catty a mash a works wid har bunna man. She decide say since di bunna man always a do "da ting deh" fi har, weh she like so much, she decide seh she finally have di courage fi do back "da ting deh" fi him. Anyways, wen she a shot it a piece a chokings mash har up wicked. A bare vomiting she end up a pudung. Wen di bunna man staat to console har an a tek cyere a har, him mek a very strange statement. Him say "nuh feel nuh way, wen me did do it fi di first time too, mi choke an nearly vomit too." Di woman was so shocked an confused dat she did fraid fi ask him weh him really mean. Di key issue here is, according to di books dem weh mi read bout "da ting deh", nuh only wen woman a dweet to man dem likely fi choke?? According to di books dem weh mi read, (an unu might know fram fi unu owna experiences), wen man dweet to woman nuttin nuh de deh fi choke dem. So di big question is, 'A WA DID A CHOKE HIM??!!

Some a my bredren dem say him really did a talk bout "da ting deh" weh man do to woman. Is just dat him neva say it di right way.

Mi tell har say she shoulda did ask him. She say she did fraid a di ansa weh she mighta did get. Soh it look like she rada continue wid a bunna man who she nuh sure if him a choke pon DAT, dan fi know fi sure an decisively deal wid di fact say is a man like dat she a bun har husband wid all dis time.

Reach Ragashanti at mixup raga@gmail.com or PO Box 5866, Liguanea PO, Kingston.