Bless-up to all a mi Tambareen family an mi Mix Up massive. An di usual prapa respek to all listeners pon Tambareen radio ova Mix Up Yaad (mixupyaad.com). Straight to di mix up:

Bad Juice

Raga, me want you loud up a gal fi me. Me an me man de fram wi little. And we have we ups and downs like everybody else. Me know say Satan lead me man a stray and make him get involve wid all kind a careless gals. But them never past them place wid me yet.

Raga, which part me work me have to walk past a certain intersection in New Kingston every evening when me a go home. Me always walk go Half-Way Tree and save the extra fare weh me would a have to pay. From wha day me notice say every evening me see this gal. At first me never pay it no mind, cause a mostly the same set a working people walk da route deh every evening. But me notice say every evening me see har an she always a look pon me. Raga, me did a wonder if she was a lesbian.

De gal keep on a stare pon me an a stare pon me so till one evening as me see har me did tell one a me friend who a walk wid me. Me friend look pon har an run a joke an same time di two a we laugh. De gal couldn't hear what me fren say but she could see say we did a laugh. Same time me hear she say, "You can stay de a laugh affa who a feed you". Raga, me an me friend did a look pon we one another strange, cause we a say da gal ya a mus a mad gal.

Raga, me tell one a me bad ghetto friend and she say she a go walk wid me an ask di gal wa a gwaan. When me friend come we see har and a wait fi she say something. She never say anything. So me friend just go up to har and say, "Hey gal a weh yuh a trouble me friend fa?" Same time di gal fling dung har bag an get loud and a say she no fraid a nobody an how she a go fight di two a we, and how a no fi har fault make ——- deh a har yard every night. Raga, a me man name ——-. So my friend ask har if she an me man a sort out. Raga, di gal say yes, and say a fi har man, cause ——- tell har say him lef me long time. So me just tell har say me man could never deh wid somebody like she. Raga, she start tell me everything bout him, and everthing a did true. She all a talk up bout di style dem weh dem give dem one another in a sort out and how dem go expensive hotel pon a weekend. Raga, me man never carry me go hotel yet. She say a wen me man did go country from a Friday fi attend him brother funeral pon a Saturday. She say she an him did go the hotel from the Friday and that him left from the hotel the Saturday and go down a St Elizabeth a him brother funeral, then go back to the hotel and come home back the Sunday. And Raga, the whole time me did think him deh a country a help him family wid him brother funeral.

But Raga, the wickedest part a when my friend turn to me and say she cyaan believe say ——- go pick dem crawny gal ya. Raga, di gal bus out that me eat up the crawny gal food wid har juice though. Raga, she say plenty time when she cook, me man make she share out food fi me too. She say a she did come up wid the idea fi share my food in a the styrofoam box them weh them always serve a restaurant, so that me tink a buy him buy it. Raga, me can't even tell you weh the gal say she take juice from ... put in a the food weh me man take from har an bring home come give me. Di nasty gal can fight Raga, but she couldn't manage the two a we. When we done wid har she stay bad.

Raga, me an me man still deh, and me naw lef him. The only way me left him a when them lock me casket. Me naa make no gal come take my man fram me. But him jus cyaan bring home no more food come give me. Raga, loud up the gal weh get a good beaten pon Trafalgar Road.

Me not louding up nobady!! Yuh a eediat? Even if yuh did beat out har nastiness, dat still cyaan compare to di juice weh mighta did season up all dem food deh weh yuh man gi yuh. Yuh a real kunu-munu, eeh!! Yuh nuh have nooo reason fi a celebrate. Celebrate afta yuh tek a good wash out. Cause if dem deh juice still inna yuh den yuh need some purging. Yuh need some salts, black pill an cenna. An mek sure yuh bwile di cenna pod dem good so dat wen yuh drink it yuh get a good clean out.

An yuh de deh like a fool only a cuss di woman. Yuh fi cuss yuh man too, cause him a luu like Lucy Luu, bout him a mek matie regularly cook food fi him bring home to wifey. A him a di real wicked! A him yuh fi cuss!! A him mek she feel she can hype pon yuh dem way deh.

Right ya now yuh really a clown out yuh self. Stop pree di gyal an staat medz yuh man, cause him naa move right. Even if him a do di gallis ting, him still shouldn't a mek dem monkey move deh. Stop focus pon di B an staat govan yuh ting. An memba fi tek di wash out, cause inna yuh mus carbine up. Good luck wid yuh belly.