Mannaz an blessings to all Tambareen Fambily linky-linky an mi Mix-up an Blenda massive. Propa respek to all listeners pon Tambareen Radio ova Mix-up Yaad (mixup-yaad.com). An crazy big up too to all a unu mad head inna di Outa Orda crew. Bless up unu self fi real. Mix up time!

Revenge Mix-up

Raga mi did a talk to dis boy fi almost six years now. Di boy wuda bun mi till mi fool. If him did a bun mi wid woman who look good or if dem did have more dan wa mi have it wudn't bun mi so much. But a bare ugly crawny gal him always a pick up.

An a dem gal deh him mek come a inna argument wid mi. Big, big me weh graduate fram high school wid mi subject dem him mek dunce gal come a class up dem self wid me. Mi talk to him bout dem an him deny it. But afta him deny say him inna tings wid dem, him goh bax dem dung fi come a talk to me. Raga, which gal a goh mek man bax har dung fi in a argument wid another woman if she an him neva inna tings?

But Raga a nuh dat a di real excitement. Raga afta mi jus tyad a dis boy an him backwardness mi just give up. Mi tell di boy mi a leave him an him run come put him hand pon me. Mi tell me uncle dem an dem warn him say if him do it again dem a goh chop him up. Him come back a tell mi how him neva believe say mi wuda do dat to him an goh tell mi uncle weh him do. Him a gwaan like it right fi him come bax me up an me fi jus tek it so. So mi run him an tell him me nuh waan hear nottin fram him an me done wid him. After a while me nuh see him fi about two weeks.

Raga after di two weeks di bwoy tun up a mi yaad an say him come fi him tings dem weh him did leave in a di house. Raga mi naa lie, wen me see him me realise how much me did miss him. Me all a talk to him nice. Raga me did all a give him hint say him can come sort me out. But di damn boy did jus a gwaan like him nuh have no more nature fi me. Mi all staat tink say him really did find other gal weh him love. It start bother me Raga. All him a do a rush fi pick up him tings an leave. Mi all stan up a di door wen him a go weh an tell him say him can stay wid me little longer before him leave an di boy jus say him no waan do dat an push past me. Raga it bother me wen him just past me an lef dat mi did all have fi baal. Raga mi baal whole night. So me call him an tell him fi come back over cause me waan say something to him. Him tell me say me no have noting fi say weh him waan hear, and tell me say me nuh fi call back him phone. Raga mi baal whole night, cause a far me an him a come fram an mi cudn't undastan how him cuda just a gwaan so.

Raga mi wake up di nex mawnin tiad, tiad cause a bare baaling me do whole night an never get much sleep. Mi bade an put on me clothes an pick up me bag an lef fi work. Raga, wen mi in a di bus an open mi bag fi take out me money fi pay di conducta a nearly dead! Raga a four big old lizard dat did in a mi bag! Mi scream an baal out an fling weh di bag in a di bus! Di passenger dem staat scream out too! D lizard dem a run all bout in a di bus an di people dem a baal out an a push dung dem one another. Raga di bus nearly crash! Di driver stop di bus an him an di conducta an some oda man kill two a di lizard dem an di oda two get weh. Raga di people dem all staat cuss me bout me involve in a obeah. All me a tell dem say mi nuh know how four lizard reach in a mi hand bag dem still nuh believe me. Raga me shame, shame, shame. Yuh fi see how di people dem a avoid me an a scorn me.

Raga, a wen me come off a di bus it crass mi mind say a di boy put di lizard dem in a mi bag. It staat make sense say him never want sort me out cause him know him did put di lizard dem inna me bag. Raga me call di boy same time an ask him. Raga yuh know say di boy bust out one big laugh an tell me say him did have fi teach me one last lesson. Raga one man can wicked so? Di boy know how me fraid a lizard an do dat to me. Raga me hate him, hate him, hate him. Him better make sure me no see him again. All me mother want ketch him. A betta him did bax me dan do me dat.

Look ya gyal!! Yuh know say yuh nearly mek mi pee-pee up mi self! Noooo sah! Da bredda deh nuh real. Him goh haad. Mi jus a imagine yuh face wen yuh jus see di lizard dem an how di passenger dem a get busy wen lizard staat run all ova di bus! Maaaaawwd!!

Him tek spite to aneda level. Him know yuh well fraid a di lizard dem an decide fi sheg yuh up wicked. Him coulda kill yuh. Shock coulda kill yuh. Mi nuh rate weh him do. A pickney move dat. But me naa lie still, di bus drama mek mi haffi laugh though.

Mi nuh agree wid yuh bout it woulda betta if him did bax yuh. A betta him do weh him do dan fi goh put on any violence pon yuh. Jus give tanx say yuh survive it. Trus mi, one day yuh a goh look back pon dis an laugh. Bless up yuh self.