Lawd have mercy unnu see how Spice draw me out pon di people dem Magum show Satideh?!

Mi naa tell no lie all now mi a wonda a wah fly up inna mi kin fi mek mi a flick an a split suh! When mi hear di song it come een like seh mi skin ketch a fire and mi not even realise when the split tek place! Mi a seh no sah Spice cyaa come mash mi up pon mi show mi haffi represent fi di fluffy divas dem an go haard or go home! Di only ting is chu mi no use to dem kinda acrobatics deh a pain killa mi haffi deh pon!lol

Big up Spice caw she gwaan good and mi up fi a rematch a mi party March 17 caw outta Danny's Marina tun up well LOUD! So Spice ready when yuh ready good gal caw we body great! An mek mi jus formally invite di whole a unnu to mi party... mi want unnu come out come enjoy unnu self and come celebrate wid mi. Tell a friend an bring a dozen more! To how mi love my fans dem an love excitement mi all a serve free breakfast inna di early morning deh. Ackee an saltfish an roast breadfruit but mi hope nobody no tek washout and come caw everybody haffi get! Mi want all people from farin fly dung fi it caw we deh right side a di airport so unnu jus hop offa di plane, party and fly out back! Raaaaay!

No, mi naa lie mi rate every promota caw dah party keeping ting yah no easy at all. The stress and di cost alone mek yuh entire body hurt yuh! But as a mi birthday mi put on sumting and gwaan hope seh it shaaat like a M-16! Age soon come offa calendar, a wah dis fadda God an mi jus born?!

Sometime di youth wah some man a look fah scare mi because some a dem deh wid some likkle gal wah coulda be dem dawta! As long as dem legal still to each his own but some age gaps are too wide to fill and though you may have a one or two case that go against the norm, we cyaa live we life on the probability of an anamoly.

age gap

When mi a talk bout age gap mi mean like 20s deh wid 50s and 30s deh wid 60s. Some people lead wholesome relationships but how many of dem are truly happy? Nuff time is the financial gains and comforts why nuff a dem stick it out. Caw talk truth everytime yuh go out somebody a ask yuh fi tell yuh fadda sumting or a tell yuh seh yuh dawta look pretty! It no bodda some and it surely bodda some. With these wide age gaps many time mental manipulation is also at play because of the younger one's inexperience and the older one's exposure. Nuff a dem done live dem life already and goodly made a mess of it and waa come live vicariously through dem younger partner and nuff time yuh end up deh wid a father or mother more than a partner!

An is not jus di man dem a look di younger people dem. Mi no have a problem if a woman want fi mind a man as long as she naaa mind dung herself. So she naa go buy him a expensive car and she a tek bus or when she call him fi come pick her up him tell her hol' a taxi caw him an him fren dem deh a Hellshire a eat fish an she haffi love up dat! Nuff man rescue nuff woman an mek dem live weh dem live and drive wah dem drive so if a woman waa mind a fi her business, worst if she got it like dat! But some a dem naa cut no dash, no mek no sense an waa come lie dung inna di people dem bwoy pickney life like a mattress weh full a chink an no have no spring!

Then yuh have di lazy wutliss pint bokkle gal dem who a wait like a human termite pon a man who older fi rob him an scam him, bubble pon him mek him feel alive an open him bank book same time! Bless di few real cases a genuine love wid the age gap wide but also people haffi look and know weh dem a do because people have dem ulterior motive and sometime yuh tink yuh a tek up a big man or big woman an a crasses yuh a tek up!

Nuff time yuh may end up need pressure pill before dem because many take advantage of your youthful exuberance. If a one no out deh and know runnings and know life it can be dangerous waters to navigate caw nobody no waa waste dem life.Some a dem come wid all the right sayings because dem know wah yuh likkle young heart desire and by the time yuh fall in love wid wah you tink is stability, dem come out pon yuh like a black widow spider and not everybody can bounce back. Love no have no age limit but we haffi be realistic about it.

misskitty@gleanerjm.com