Waa gwaan deh mi starlets, hope everyting good wid unnu, and unnu just gwaan hol di faith an pray. Time ruff but unnu dun know we haffi hol it because darkest part a di night come before the morning light!

From wah day yah mi can neither enjoy night breeze nor morning breeze because a di dutty, smell bad smoke weh a come from over Riverton dump! Now from me born di dump comein like a ticking time bomb jus' a wait fi explode and cause problem to those near and far and to the environment as well.

Every so often the dump ketch a fire and is one hell fi get it under control and sort out! By the time the thick black smoke innoculate the whole surroundings and people throat, the after-effect is devastating. People who have bad sinus and asthma feel it under the smoke and especially di likkle baby dem at school and home, a dem mi fret fah. When sum big, grey-tone people can manage fi drink wata or bear di discomfort, the poor babies are unable to so.

The mystery that surrounds how di dump light is a continuous blame game between who deh deh and who no deh deh. Some people on the outside are of the view that a di people dem dung deh light it chu dem waa secure work and light it as a means fi generate income because a dem same one dem haffi go use fi out it. Di people dung deh a seh anno dem cause it wouldn't really benefit dem fi light the dump when a it dem live and survive offa. Dem seh most a di time when di rubbish come in dem search it and find dem likkle loom and scrapses fi sell and mek a money, and when di dump light no hustling cyaa gwaan and dat no good fi dem. Dem a seh sometime wah happen is dat di rubbish like sum ole drum pan a road light and come dump same place and chu it neva out before it reach di dump dat same drum pan come and mix wid odda elements and ketch di whole place a fire. This forced me to ask di question, why don't we have proper waste managment? Everyting cyaa just dump one place wid all hazardous material deh inna one bungle, dat is a recipe fi disaster!

control and regulate

Technology too advance yah now fi we cyaa come up wid a proper solution to the Riverton dump problem so dat people can stop suffer. Not only does it affect di people but other tings like the devaluation of people property. Yuh can imagine u buy yuh house fi how much million and because di authority dem cyaa control the smoke ur property value drop while dem deh pon di hill a look dung pon di big black smoke a cover di place?

Fi dem house value ago always up deh but a wonda if the dump di deh near dem if a so long it woulda tek fi sort out? Everytime there is a flare-up at di dump it takes millions to control and regulate it ... millions that could be used to help poor people, create jobs, build schools, or better the health-care system, which is a sad situation. Unnu see from when mi write bout di radiation machine dung a KPH and how it naa work and how people a dead caw dem cyaa afford di dear treatment and all now nobody no have di decency fi reply publicly so we can know wat a gwaan ... a so yah so stay!

We cyaa tek so long fi control dem kinda smoke yah and instead of reacting to the smoke, measures to prevent or minimise it need to be implimented fass! Some people a seh fi relocate it but relocate it weh? And when dem relocate it di people who unfortunately haffi survive offa it who ago gi dem job so dem no haffi suffer or turn to crime? It might fi move, yes, but a nuff slip between di cup and di lip fi move di dump because a some people survival dat!

We ned fi start be a more proactive country than a reactive one. Dem big, black, ugly smoke deh weh me see a come from di dump cyaa healthy fi not even a dawg wid mainge! When yuh a drive dah side deh yuh haffi a drive wid extra caution cause is like yuh out fi crash because a di "blackout"! To how di smoke strong all di false hair pick it up or a more like it heng on in deh! Di smoke situation bad man, an di longer it tek fi sort out di more money we a lose and more people a suffer.

Den again, when di people dem pickney sick or dem sick chu di smoke who reimburse dem or gi dem a ting towards dem docta bill? Afterall is not like a dem see di smoke an go run up inna it! Wat is the course of action for persons who are adversely affected by the burning dump? Di people dem whose likkle backyaad garden swibble and dead, people whoffa pets get affected and who lose pay because dem no get fi work, how dem money deh a go?!