Tambareen Fambily an Mix Up massive large up unu self to di max. An big up mi Tambareen Radio linky-linky ova Mix Up Yaad (mixupyaad.com).

Right away mi haffi staat rinse bout it: Whitney drap out! Mi is a man grounded inna reality, an mi know everybody who deh pon earth haffi goh sometime. Mi did also well aware seh di drugs ting did a beat Whitney bad. An while mi nuh hear yet exactly wa kill har - mi still neva did a expect har fi drap out soh early.

As mi did mention pon mi Internet wall dem, the thing about Whitney was that she had a rare combination of 6 notable blessings: di woman was incredibly talented, very famous, remarkably pretty, overwhelmingly wealthy, globally loved and simply a nice person. We know a whole heap a people with 1 or 2 of these qualities and not the others: some people pretty but fool-fool, rich but wicked, talented but pap dung, nice and loved but bruk lakka church mouse,....and whole heap more combinations. Whitney had it ALL!! But ALL was a problem! ALL took her life! Di sadness an depression weh shi experience wen shi did famous, rich an successful neva deh wid har wen nobady neva know har an shi neva have nuh money. Mi a medz har passing an a remind mi self dat nuttin nuh wrong wid seeking MORE inna life, but mi also know dat 'MORE' and 'ALL' will neva mek mi figet say REAL HAPPINESS lies in the SIMPLE tings in life. Wi nuh fi mek we selves get lost inna di rat race an di crab-inna-barrel vibz of life an figet di simplicity of happiness. A me say "Laugh, Learn and Grow" straight! Whitney, bless up yuh self - yuh life, an yes, yuh death too, serve as lessons from which millions a people a benefit. If a heaven deh fi real a hope yuh lock off a likkle ends in deh. Bless up.

Even though di Whitney ting kinda mellow out di mood, mi still have a mix up:

Wifey an Bunna Man Doctor

A married woman have a bunna man who a one docta. A likkle sickness tek har husband an di husband tell di wife say him haffi goh find a different docta cause him regular docta migrate an gaan a England. Di wife nuh do nuttin more dan strongly recommend a docta to him - har bunna man! Shi tell har husband say di docta is har fren husban. Pon top a dat shi tek money fram har husband fi pay di docta, but keep di money fi har self.

Di bunna man docta neva did waan do dat to di husban, but di wife insist an insist an insist so till him finally agree because him waan shi stop bada him. But get dis, wen di husband deh a di docta office an done get him treatment di wife tell him say shi haffi go talk to one a di lady inna di office. Wen shi go back fi talk to di lady, shi neatly tek it through a side door a goh back inna di room wid di docta. Den shi staat bada di docta fi him shot a quick sort out. Di bunna man docta realise say shi did a get off pon di excitement of having har bunna man treat har husban an was even more excited wid di idea of sorting out di docta while har husban a wait inna di lobby.

Di bunna man docta say him staat feel bad fi di husband an absolutely insist seh him not gwine sort har out wen har husband de deh. Di wife neva stop pressure di docta an wouldn't leave him office soh till shi say him must at least mek shi gi him a swipe. Him did tell har no to dat too but eventually him mek shi bus di swipe because him did jus want har fi leave an done di drama inna him office. Shi do har ting an lef wid har husband.

Later shi call di bunna man docta an a bus bare big laugh bout how exciting it was dat him a har bunna man an a him treat har husband and how shi do di swipe while har husband did a wait inna di lobby. Di docta say di whole ting mek him look pon har different, even though him know fram long time say shi did married. Him say di whole ting turn him off so much dat him all stop sort out wid di wife. Him all a tink fi stop bun fi him wife too (yes, di bunna man docta have him owna wife).

Di bunna man docta say di reason him tell mi di drama is because him always hear mi a talk bout 'bun wid respek' an neva really undastan it until di drama goh dung wid di woman an har husban. Him say shi neva did haffi tek di ting to da level deh. Di whole ting mek him a goh through some reflection an medzing bout how people stay an what dem capable of.

Aaaaayyyy bwoy!.....life

Reach Ragashanti at mixupraga@gmail.com or PO Box 5866, Liguanea PO, Kingston 6.