Big up all Mix Up linky-linky an all a mi Tambareen Fambily massive. An bless up to all listeners pon Tambareen Radio ova Mix Up Yaad (mixupyaad.com).

Straight to di mix up:

Fren a deh wid Fren Ex

RAGGA! Big up the girl from ———- —— weh a sleep with my ex-man cousin every whenever she can get it, fi over two years while the man have him woman weh him in an out wid, an him pickney dem a look bout. Recently, the girl a look status upgrade, an di man tell her seh him naa no room inna him life fi anybody else anymore. NOW THIS IS WHERE THE STORY START! Dis carless gyal, true she need money over the Christmas holiday, rent out her own bedroom in her house (parents house aldoe she a 33 years old) for the entire week following Christmas. Anyway, it turns out she neva have noweh fi stay while the room a rent, so a so she call the man fi see if she could stay there for the week. Unfortunately, the man done have a woman a stay a him yard from farin fi di holiday. So him give her a excuse seh him naa no space an she get suspicious. So she drive go him yard, ongle fi see one white gyal a cool out on the porch, dwl! She jus speed off an go a her yard.

Hear weh happen next, you know seh di gyal drive go down a one well-known bar, ongle fi buck up inna my ex (who is also the cousin of the man weh she a sort out, we are all friends of sorts). Anyway, dem de deh an she buy him a drink, an dem de deh a chat fi God knows how long about God knows what. U know seh the same night she call me outa me sleep, way way a country, fi tell me seh she an me ex did a hold a nice conversation an she feel like she woulda sort him out, so she a call me fi get permission fi sort out my my ex (who, by the way, me still sort out on occasion).

NOW! RAGGA! A wa do dis gyal! U know me tell her fi do weh she want, because if u done a have the thought, the offense done commit. So why me care if dem commit the act! Kmt! An me have daggering standards inno, jus' sayin. Guess wah happen? She call me back the next day fi tell me seh she go link him an notn neva gwan, him neva run een di way she did want. Dwl! Notn more than the man naa look her! Di gyal no stay well an she desperate bad! Not to mention she a sort out him cousin weh him grow wid inna di same house.

Me haffi laugh, look how she mek me know how she tan, an she still neva get no sort out fram him. A so some a dem love gwan, like man see dem, an di poor man all jus' a try fi be nice cause a him ooman friend. So right now dem can galang. The whole mix-up stinks like yessiday nappy! An me jus' neatly remove meself from it. Dem sick me stomuck! An me did like sort out an swipe de bredda de inno. Ragga lata. Me jus' a dash me likkle ray pan u.

Mannas.

Bwoy, oh bwoy. A guess di key issue here is wether or not yuh fren was doing something good wen shi call u an ask yuh permission fi sort out yuh ex man - with whom shi also neva know seh yuh still a squeeze a one dagga every now an den. Di matta raise di following questions

Is it eva okay fi yuh fren deh wid yuh ex? An, if so, wen is it ok fi yuh fren do dat wid yuh ex?

Is there a difference if yuh fren jus sort out yuh ex, as opposed to if yuh fren goh deh wid yuh ex?

Also, is it honourable an good ting fi yuh good fren come respectfully ask yuh permission fi deh wid yuh ex? An, if dem a ask yuh, does dat mean dat dem much betta dan di one dem who wouldn't ask, but woulda jus hide an dweet, an still a laugh an chat wid yuh?

One a di main problems wid da ting ya is dat wen yuh fren jus even express interest inna yuh ex, yuh immediately staat wonda wen exactly was it dat dem staat like yuh ex, an if dem did a do anyting aready - which, in turn, can negatively affect unu present frenship.

In general, mi nuh tink yuh fi trus a so-called 'fren' who have interest inna yuh ex. But if is a case where 10, 15 or 20 years past, an dem waan link up, den probably mi woulda more likely waan continue di frenship but, outside a dat, mi couldn't trus da fren deh. Afta mi nuh waan dem poison mi!!